Selimi për çështjen e të të pagjeturve: Do të përfshihet në marrëveshjen finale

Ministri i Drejtësisë, Selim Selimi, gjatë raportimit në Komisionin parlamentar për të drejtat e njeriut tha se kjo ka qenë tema e parë që është ngritur në Bruksel dhe se do të insistojnë që në marrëveshjen finale të marrin zotimin e Serbisë për rikthimin e trupave dhe ballafaqimin e saj me të kaluarën.

Ai tha se do të insistojnë që pas marrëveshjes finale në afat prej 18 muajsh Serbia të zbatojë marrëveshjen për të të pagjeturit.

Ndërsa, kryesuesi i delegacionit të Kosovës në grupin punues për çështjen e zhdukurve, Ibrahim Makolli tha se në Bruksel janë arritur parimet bazë për marrëveshjen për personat e zhdukur. Por sipas tij ajo do të inkorporohet në marrëveshjen finale.

Kritika ndaj Qeverisë së Hotit për këtë çështje adresoi anëtarja e komisionit nga LVV-ja, Saranda Bogujevci, e cila kërkoi sqarime shtesë për marrëveshjen e Uashingtonit.

Sipas saj, atje është bërë barazim i çështjes së të pagjeturve dhe të zhvendosurve.

E deputetja e PDK-së, Besa Ismaili akuzoi Qeverinë e Hotit për mungesë të transparencës për këtë çështje.