“Qeveria s’ka plan”, Haradinaj fton partitë politike që ta ringjallin ekonominë

Kryetari i AAK-së, Ramush Haradinaj ka thënë se Qeveria e Kosovës nuk ka asnjë plan për ringjalljen e ekonomisë.

Ai ftoi partitë politike që të përkushtohen bashkarisht, pasi që sipas tij, ekonomia e Kosovës, posaçërisht sektori privat është në vështirësi dhe kërkon intervenim direkt për rimëkëmbje nga shteti, shkruan Indeksonline.

Njoftimi i plotë:

Qeveria e Kosovës ashtu siç nuk kishte asnjë plan konkret për pandeminë, nuk ka asnjë plan as për ekonominë.

E kemi theksuar edhe në konferencën për media për temën e Ekonomisë, që pakoja e ashtuquajtur e ‘Ringjalljes’, nuk e ka as fokus e as qëllim ekonominë. Me masa tërësisht sociale, kjo pako ka të vetmin qëllim “ringjalljen” e votuesve, të cilët për pak muaj e kanë kuptuar që kanë votuar për mashtrim.

Ekonomia e Kosovës, posaçërisht sektori privat është në vështirësi dhe kërkon intervenim direkt për rimëkëmbje nga shteti. Pavarësisht që para nesh janë zgjedhjet lokale, është nevojë emergjente të merremi me ekonominë. Në të kundërtën, shteti, komunat dhe qytetarët do t’i vuajnë pasojat për shumë vite të ardhshme!

Në mungesë të reflektimit të Qeverisë, ftoj partitë politike të përkushtohemi bashkërisht.