Kryetari Elezaj ngatërron datën e seancës, shtyhet gjykimi ku ishte paraparë të jepej fjala përfundimtare

Kryetari i Komunës së Klinës, Zenun Elezaj, nuk u paraqit në seancën e së martës, me arsyetimin se ka ngatërruar datën e seancës, andaj kjo u bë shkak që të shtyhej seanca ku ishte e paraparë të jepej fjala përfundimtare në këtë rast, ku Elezaj akuzohet për konflikt të interesit.

Mbrojtësi i të akuzuarit Elezaj, avokati Kujtim Kërveshi, bëri të ditur që pas bisedës me të mbrojturin e tij, i njëjti ka thënë që e ka ngatërruar datën për seancën e caktuar për fjalën përfundimtare, raporton ‘’Betimi për Drejtësi’’.

Në këto rrethana, kryetarja e trupit gjykues, Violeta Husaj-Rugova, seancën e radhës e caktoi për 25 nëntor të këtij viti.

Ky rast është kthyer në rigjykim nga Gjykata e Apelit, me 28 prill 2021.

Zenun Elezaj ishte shpallur fajtor nga Gjykata Themelore në Pejë më 29 dhjetor 2020 dhe ishte dënuar me 4 mijë euro gjobë, për veprën penale “konflikti i interesit”.

Mirëpo, kolegji i gjykatësve të Apelit, kryesuar nga Tonka Berisha, kanë konstatuar se vendimi i shkallës së parë ishte rezultat i shkeljeve procedurale dhe mungesë e vërtetimit të plotë gjendjes faktike, për çka rastin e kanë kthyer në rigjykim.

Sipas aktakuzës së ngritur më 9 tetor të vitit 2019 nga Prokuroria Themelore në Pejë, Zenun Elezaj akuzohet se më 20 shkurt 2018, në cilësinë e kryetarit të Komunës së Klinës, duke e ditur se vajza e tij ka për të aplikuar në pozitën “Mjeke e praksës së përgjithshme”, në Qendrën Kryesore të Mjekësisë Familjare (QKMF) në Klinë, ka marrë pjesë personalisht në këtë çështje zyrtare, duke marrë vendim për formimin e komisionit për zhvillimin e procedurave për krijimin e marrëdhënies së punës.

Sipas aktakuzës, komisioni të cilin Elezaj e kishte formuar e kishte përzgjedhur si punëtore vajzën e kryetarit të Klinës, duke e punësuar atë në QKMF-në “Nëna Terezë”, në Klinë.

Në aktakuzë thuhet se hetimet ndaj kryetarit të Klinës, kanë filluar nga kallëzimi penal i ushtruar nga Agjencia Kundër Korrupsion në Prishtinë, ku sipas opinionit të dhënë për prokurorinë, AKK-ja kishte përcaktuar se kryetari i Komunës duhet të përjashtohet nga çfarëdo çështje vendimmarrëse dhe administrative që kanë të bëjnë me ndonjë anëtar të afërm të familjes.

Prokuroria Themelore në Pejë, sipas aktakuzës, më pas ka nisur hetimet ndaj Elezajt më 26 gusht të këtij viti, ku pas analizimit të provave materiale dhe dëshmisë së dëshmitarëve dhe vet të pandehurit, kjo prokurori thuhet se ka ardhur në përfundim se ekzistojnë të gjitha elementet e veprës penale të konfliktit të interesit. /BetimipërDrejtësi