Inspektorati ndalon përdorimin e gazit medicial në disa institucione shëndetësore, kjo është arsyeja!

Inspektorati Farmaceutik i Kosovës ka bllokuar dhe ka ndaluar përdorimin e gazit medicial pasi ka zbuluar se institucionet shëndetësore janë furnizuar me këtë produkt nga operatorët të pa autorizuar, shkruan IndeksOnline.

Sipas njoftimit nga Ministria e Shëndetësisë, gazi medicial i cili është i autorizuar të qarkulloj në Republikën e Kosovës përmes AKPPM-së, duhet të përmbajë banderolën e Republikës së Kosovës, mbishkrimin dhe numrin serik të prodhimit.

Njoftimi i plotë:

Inspektorati Farmaceutik i Kosovës kërkon nga operatorët ekonomikë që shpërndajnë gaz medicinal në institucionet publike apo private, që gazi që prodhohet dhe shpërndahet të jetë vetëm nga operatorët, të cilët janë të licencuar nga autoriteti kompetent që është Agjencia Kosovare për Produkte dhe Pajisje Medicinale (AKPPM).

Gjatë inspektimeve të kryera, Inspektorati Farmaceutik ka hasur në institucione shëndetësore që janë furnizuar me gaz medicinal nga operatorë  ekonomik të pa autorizuar, me ç’rast ka bllokuar dhe ndaluar përdorimin e këtij produkti.

Gazi medicinal i cili është i autorizuar të qarkulloj në Republikën e Kosovës përmes AKPPM-së, duhet të përmbajë banderolën e Republikës së Kosovës, mbishkrimin dhe numrin serik të prodhimit.

Inspektorati Farmaceutik u bën thirrje institucioneve shëndetësore publike apo private që të furnizohen me gaz medicinal vetëm nga operatorët ekonomik të licencuar për shpërndarjen e gazit medicinal nga AKPPM.