Thaçi: Kur ministrja e Jashtme e mohon UÇK-në ajo nuk e ofendon UÇK-në, por ofendon vetën dhe Qeverinë e Kosovës
Ish zv-ministri i Arsimit, Jusuf Thaçi ka thënë se UÇK përveç organizate konkrete e fakt historik, duke luftuar e kontribuuar për realizimin e të drejtës më themelore dhe vlerës më të rëndësishme njerëzore: Lirisë, është edhe vlerë qytetërimore e ideal njerëzor universal.
Sipas Thaçit, kur ministrja e Jashtme e Kosovës, uron Ditën e Çlirimit të Kosovës duke mos e përmendur fare UÇK-në, përkatësisht duke e mohuar UÇK-në, ajo nuk e ofendon UÇK-në, por e ofendon veten dhe gjithë atë që ajo përfaqëson si qytetarë e si zyrtarë shtetërorë, përfshirë edhe Qeverinë e Kosovës.
“Ta mohosh UÇK-në si simbol të lirisë, si vlerë qytetërimore e si ideal njerëzor dëshmon primitivizëm”, ka shkruar ndër të tjera Thaçi.
Postimi i plotë i Jusuf Thaçit:
Betejën me UÇK-në e keni të humbur!
Ushtria Çlirimtare e Kosovës (UÇK), përveç organizatë konkrete e fakt historik, duke luftuar e kontribuuar për realizimin e të drejtës më themelore dhe vlerës më të rëndësishme njerëzore: LIRISË, është edhe vlerë qytetërimore e ideal njerëzor universal.
Ushtria Çlirimtare e Kosovës (UÇK), para së gjithash e mbi të gjitha, është shkaktarja e meritorja kryesore për çlirimin e Kosovës dhe si pasojë edhe për pavarësinë e Kosovës (ky fakt as nuk e mohon e as nuk e zbehë rëndësinë e punës dhe sakrificës së gjithë shqiptarëve në përgjithësi që kanë kontribuuar në çlirimin dhe pavarësimin e Kosovës, si dhe as nuk e mohon e as nuk e zbehë rëndësinë e gjithë kontributit të komunitetit ndërkombëtar për çlirimin dhe pavarësimin e Kosovës).
Ushtria Çlirimtare e Kosovës (UÇK) është ndër momentet më të shndritshme të gjithë historisë shqiptare, duke e rikthyer pas dekadash dinjitetin e humbur e të nëpërkëmbur të shqiptarëve të Kosovës.
Kur Ministrja e Punëve të Jashtme e Republikës së Kosovës uron Ditën e Çlirimit të Kosovës duke mos e përmendur fare UÇK-në, përkatësisht duke e mohuar UÇK-në, ajo nuk e ofendon UÇK-në, por e ofendon veten dhe gjithë atë që ajo përfaqëson si qytetare e si zyrtare shtetërore, përfshirë edhe Qeverinë e Republikës së Kosovës.
Ta mohosh UÇK-në si simbol të lirisë, si vlerë qytetërimore e si ideal njerëzor dëshmon primitivizëm.
Ta mohosh UÇK-në për shkak të urrejtjes që ke ndaj disa individëve të caktuar dëshmon infantilizëm.
Ta mohosh UÇK-në duke qenë përfaqësues i shtetit që është rezultat i UÇK-së dëshmon hipokrizi.
Ta mohosh UÇK-në duke u fshehur pas mos-përmendjes së saj dëshmon frikacakëri.
Sidoqoftë, një gjë duhet ta dinë mirë të gjithë ata që e relativizojnë, e mohojnë, nuk e duan apo e urrejnë UÇK-në: betejën me UÇK-në e keni të humbur! Ju jeni veç ca vdekatarë të përkohshëm, statistika të pavlera të njerëzimit, vizitorë të pagjurmë të kësaj bote. Ndërsa liria, dinjiteti e qytetërimi janë vlera e ideale njerëzore të përjetshme e të paçmueshme, do të rrojnë sa të ekzistojë njerëzimi. UÇK-ja është mishërim e simbol i këtyre vlerave e idealeve.
