Mesazhi i Presidentes Vjosa Osmani me rastin e 32 vjetorit të miratimit të Deklaratës Kushtetuese

Presidentja e Republikës së Kosovës, Vjosa Osmani ka uruar popullin e Kosovës, me rastin e përvjetorit të Deklaratës Kushtetuese.

Sipas Osmanit, kjo deklaratë shënon hapin vendimtar për realizimin e ëndrrës shekullore për shtet të Kosovës.

“114 delegatë të Kuvendit të Kosovës, atëkohë morën guximin që në rrethana dhe kushte të jashtëzakonshme nëpërmjet këtij akti heroik e juridik ta artikulojnë vullnetin e popullit të Kosovës për trajtim të barabartë” thotë Osmani.

Ajo tutje ka uruar bekim për Republikën e Kosovës dhe popullin e saj.

Ky është mesazhi i plotë i Presidentes:

Deklarata Kushtetuese e 2 korrikut të vitit 1990 shënon hapin vendimtar për realizimin e ëndrrës shekullore për shtetin e Kosovës.

114 delegatë të Kuvendit të Kosovës, atëkohë morën guximin që në rrethana dhe kushte të jashtëzakonshme nëpërmjet këtij akti heroik e juridik ta artikulojnë vullnetin e popullit të Kosovës për trajtim të barabartë.

Më tepër se tri dekada më parë, gra e burra patën guximin që Kosovës t`ia japin drejtimin e duhur, ta krijojnë bazën për subjektivitet të shtetit në ardhje, ndaj në këtë përvjetor falënderoj secilin që vuri një gur në projektin tonë historik për shtet.

Themelet e shtetit të janë ngritur mbi vendimin e delegatëve të 2 Korrikut, ndaj sot Kosova është shtet i pavarur, i lirë dhe sovran!

Urime 2 Korriku!

Zoti e bekoftë Republikën e Kosovës dhe popullin e saj!