Escobar: I morëm parasysh shqetësimet e Rakiqit

Menjëherë pas takimit me përfaqësuesit e Listës Serbe dhe kryetarët e katër komunave në veri të Kosovës, i dërguari special i SHBA-së për Ballkanin Perëndimor, Gabriel Escobar, iu drejtua gazetarëve, por nuk shpjegoi detaje nga diskutimet brenda takimit.

Ai tha se për takimin me përfaqëesuesit serbë në veri të Kosovës, do të flasë më vonë gjatë qëndrimit të planifikuar në Beograd.

“Unë vetëm dua të them se i kemi marrë parasysh shqetësimet e kryetarit të Komunës. Misioni ynë vazhdon në Beograd. Shpresoj se nga atje do të jemi në gjendje të dalim me një njoftim”, tha Escobar.

Përfaqësuesit e SHBA-së dhe BE-së, Gabriel Escobar dhe Miroslav Lajçak, sot në Beograd do të takohen me drejtorin e Zyrës për Kosovë, Petar Petkoviq dhe më pas me presidentin e Serbisë, Aleksandar Vuçiq.