Buxheti i transformimit të kryeqytetit, Rama përmend disa projekte madhore

Kryetari i Prishtinës, Përparim Rama ka reaguar pas votimit të buxhetit për vitin 2024 për kryeqytetin në vlerë prej 123 milionë e 699 mijë e 998 euro.

Rama tregon se ky do të jetë “buxheti i transformimit të kryeqytetit”, raporton Indeksonline.

Kryetari liston edhe disa nga projektet ku do të ndahet ky buxhet.

Shkrimi i plotë:

BUXHETI I TRANSFORMIMIT TË KRYEQYTETIT!

Buxheti i Kryeqytetit i cili sapo u votua në Kuvend, për vitin 2024 do të jetë 123 milionë e 699 mijë e 998 euro. Pra,rreth 20 milionë më i lartë se vitin e kaluar.

Buxheti i vitit 2024, është buxhet i projekteve të mëdha kapitale, të cilat kanë qenë premtime, qysh prej ditës së parë të punës sime në Kryeqytet. Pra, do të jetë një buxhet i TRANSFORMIMIT të Kryeqytetit.

Kemi ndarë 40 milionë e 500 mijë euro vetëm për Investime Kapitale, ku përfshihen:

– Ndërtimi i shkollave dhe çerdheve

– Spitali i Prishtinës

– Ndërtimi i Tunelit “Agim Ramadani”,

– Ndërtimi i Unazës Qendër,

– Salla e Koncerteve,

– Salla e madhe multifunksionale,

– Revitalizimi i Tullëtores

Gjithashtu, në buxhetin për vitin e ardhshëm kemi ndarë para edhe për shtimin e parqeve, menaxhimin e mbeturinave, transportin publik, ndërtimin e therrtores për kafshë.

Na priftë e mbara!