Jep dorëheqjen drejtori i BKS-së, Sami Mazreku

Drejtori i Byrosë Kosovare të Sigurimeve (BKS), Sami Mazreku, ka dhënë dorëheqje nga kjo pozitë. Këtë e ka konfirmuar vetë Mazreku përmes një postimi në Facebook.

Mazreku ka treguar edhe arsyet dorëheqjes:

“Mos aprovimi i kërkesës sime që së bashku me vendimin që ka marrë Asambleja për delegimin e trajtimit te dëmeve në kompani të sigurimeve, të transferohet edhe një pjesë konsiderueshme e stafit që lidhet me trajtimin e dëmeve si dhe mos aprovimi i buxhetit për edukim financuar ku përfshihet publikimi i gazetës, mirëmbajtja e ueb faqes, organizimi i tryezave, konferencave me gazetarë, seminareve me gazetarë, dizajnimi i grafikave… etj kanë pamundësuar që unë të vazhdoj edhe më tutje të jam në krye të BKS-së”, ka shkruar ai.

Mazreku thotë se për punën që është bërë në BKS do të flasë më vonë por që institucionin që e ka udhëhequr do të flas ditët tjera.