Vazhdon rehabilitimi i pjesës së vjetër të Prizrenit – Totaj: Po e ruajmë identitetin unik të qytetit

Kryetari i Komunës së Prizrenit, Shaqir Totaj, ka njoftuar se po vazhdon realizimi i projektit për rehabilitimin dhe rivitalizimin e zonës së parë të mbrojtur në pjesën e vjetër të qytetit.

Përmes një postimi në rrjetet sociale, Totaj ka theksuar se ky projekt ka për qëllim ruajtjen e identitetit të veçantë kulturor dhe historik të Prizrenit, si dhe kthimin e qendrës historike në një atraksion edhe më tërheqës për qytetarët dhe vizitorët.

“Po vazhdon realizimi i projektit për rehabilitimin dhe rivitalizimin e zonës së parë të mbrojtur në pjesën e vjetër të Prizrenit, me qëllim ruajtjen e identitetit unik të qytetit dhe kthimin e qendrës historike në një atraksion edhe më tërheqës për banorët e vizitorët,” ka shkruar Totaj, duke e shoqëruar njoftimin me hashtagun #Prizreninëpunë.

Pjesa e vjetër e Prizrenit është një nga pasuritë më të çmuara kulturore të Kosovës dhe përfshin ndërtesa me rëndësi historike, rrugica karakteristike dhe objekte fetare e kulturore që i japin qytetit një atmosferë unike. Rehabilitimi i kësaj zone synon jo vetëm ruajtjen e trashëgimisë kulturore, por edhe nxitjen e turizmit dhe zhvillimit ekonomik lokal.