Abdixhiku prezanton 10 zotimet kryesore të LDK-së për Kosovën

Kryetari i Lidhjes Demokratike të Kosovës dhe njëherësh kandidat për kryeministër, Lumir Abdixhiku, ka prezantuar sot 10 zotimet kryesore të LDK-së për Kosovën, duke i cilësuar ato si zotime të qarta, plane konkrete dhe përgjegjësi direkte ndaj secilit qytetar.

Përmes një postimi në facebook, Abdixhiku ka theksuar se LDK ka program, ekip dhe vullnet për të sjellë ndryshim, duke ftuar qytetarët të zgjedhin shpresën për familjet, për të rinjtë dhe për të ardhmen e vendit.

“LDK ka program. Ka ekip. Ka vullnet. Le të zgjedhim shpresën”, ka deklaruar Abdixhiku.

Ndër zotimet kryesore të prezantuara përfshihen paga 1000 euro për mësuesit, paga 900 euro për policët, ushtarët dhe zjarrfikësit, 2400 euro për çdo të porsalindur, rritje e koeficientit të pagave për punëtorët publikë, gjashtë muaj pagesë për të papunët, pensione minimale 300 euro, investime në arsim dhe trajnim profesional për të rinjtë, si dhe projekte strategjike kombëtare në infrastrukturë, energji, shëndetësi dhe turizëm./IndeksOnline/