Pija më e mirë e mëngjesit për hidratim, sipas dietologëve

Sipas dietologëve, pija më e mirë për hidratim në mëngjes është uji i thjeshtë, madje edhe përpara kafesë.

Hidratimi shpesh mund të duket i ndërlikuar, sidomos me pijet me elektrolite dhe trendet e reja të mëngjesit. Por mëngjesi është një moment i rëndësishëm për hidratimin, sepse gjatë natës trupi humb lëngje përmes frymëmarrjes, djersitjes dhe urinimit. Edhe pse nuk është pije “moderne”, uji mbetet zgjedhja më e mirë për të nisur ditën, ka shkruar EatingWell.

Pirja e ujit sapo zgjoheni ndihmon në rihidratimin e trupit, rikthimin e ekuilibrit dhe ju përgatit për një ditë më energjike dhe me mendje më të kthjellët.

Pse uji funksionon kaq mirë në mëngjes

Ndihmon funksionin e trurit dhe rregullon humorin

Rihidratimi në mëngjes ndihmon për mendim më të qartë dhe humor më të mirë gjatë ditës. Dietologia Alexandria Hardy shpjegon se rihidratimi mbështet funksionet qelizore dhe metabolike, ndihmon sistemin kardiovaskular dhe përmirëson humorin dhe performancën mendore.

Studimet tregojnë se niveli i hidratimit luan rol të rëndësishëm në përqendrim, kujtesë dhe funksionim mendor në përgjithësi.

Një studim i fundit ka treguar se të rriturit e moshuar me nivel më të mirë hidratimi kishin rezultate më të mira në testet e kujtesës, të mësuarit dhe shpejtësisë së përpunimit të informacionit.

Dietologia Kelly Jones ka shtuar se studime vëzhguese e lidhin konsumimin e ulët të ujit me rrezik më të lartë për ankth dhe simptoma depresive, si te të rriturit ashtu edhe te adoleshentët.

Mbështet tretjen

Uji ndihmon sistemin tretës duke përmirësuar lëvizjen e stomakut dhe zbërthimin e ushqimeve. Hidratimi në mëngjes mund të ndihmojë edhe kundër kapsllëkut dhe përmirëson procesin e tretjes.

Ndihmon funksionet bazë të trupit

Rreth 60 për qind e trupit të njeriut përbëhet nga uji dhe ai është i domosdoshëm për pothuajse çdo funksion jetik.

Uji ndihmon në:
-zbërthimin dhe transportimin e lëndëve ushqyese te qelizat
-dërgimin e oksigjenit në qeliza
-rregullimin e temperaturës së trupit
-Hidratimin e gojës, syve e hundës
-mbrojtjen e organeve jetike
-lubrifikimin e nyjave për lëvizje më të lehtë

Parandalon dehidratimin

Edhe nëse nuk ndiheni të etur, pas disa orësh gjumë trupi zakonisht është pak i dehidratuar.

“Zakonisht zgjohemi lehtë të dehidratuar për shkak të frymëmarrjes, djersitjes dhe urinimit gjatë natës”, ka shpjeguar Hardy.

Pirja e ujit menjëherë pas zgjimit ndihmon në rikthimin e lëngjeve të humbura dhe mund të parandalojë lodhjen dhe plogështinë.

Jones ka shtuar se pas një nate pa ushqim dhe lëngje, uji i thjeshtë i jep trupit pikërisht atë që i nevojitet për energji dhe tretje optimale.