Dosja “Epstein”, arrestimi i ish-princit Andrew nxit thirrje për drejtësi në SHBA

Arrestimi i ish-princit, Andrew Mountbatten-Windsor nën dyshimin për sjellje të keqe në detyrën publike në Mbretërinë e Bashkuar ka nxitur thirrje nga ligjvënësit amerikanë dhe të mbijetuarit e abuzimit seksual të Jeffrey Epstein për të kërkuar llogari nga ata që janë të lidhur me abuzuesin seksual përtej Atlantikut.

Mountbatten-Windsor u arrestua të enjten në lidhje me sjelljen e tij si i dërguar tregtar i Mbretërisë së Bashkuar dhe pas zbulimit të email-eve të lidhura me Epstein, abuzuesin e dënuar seksual. Ai u lirua nën hetim të enjten në mbrëmje pasi policia e mori në pyetje në lidhje me akuzat se ai kishte ndarë materiale konfidenciale me Epsteinin.

Ai ka mohuar vazhdimisht çdo shkelje që lidhet me Epstein, dhe arrestimi i së enjtes nuk lidhet me ndonjë akuzë për sjellje të pahijshme seksuale.

Lidhur me arrestimin ka folur, Skye Roberts, vëllai i së ndjerës Virginia Giuffre, e cila ishte trafikuar në Mbretërinë e Bashkuar në vitin 2001 në moshën 17 vjeç për të kryer marrëdhënie seksuale me Mountbatten-Windsor, një akuzë që ai e ka mohuar vazhdimisht dhe me forcë.

Ai theksoi se presidenti Donald Trump nuk ka bërë asgjë të ngjashme me mbretin Charles, i cili të enjten tha se do të bashkëpunojë me drejtësinë.

“Realiteti është se Mbretëria e Bashkuar po bën shumë më tepër. Mendoj se mbreti mund ta mbajë kokën lart kur vjen këtu duke thënë: ‘Po bëj më të mirën që mundem…’ Ndërsa këtu në Shtetet e Bashkuara, presidenti ynë ende nuk ka bërë as edhe një gjë të ngjashme. Dhe të mbijetuarit dhe populli janë shumë të zhgënjyer nga kjo”, tha ai.

Robert Garcia, anëtari i lartë i komitetit mbikëqyrës të Dhomës së Përfaqësuesve, lëshoi ​​një deklaratë të ngjashme, duke thënë se Shtetet e Bashkuara t’i japin fund kësaj mbulimi nga Shtëpia e Bardhë.

“Arrestimi i Andrew Mountbatten-Windsor është një hap i madh përpara në luftën tonë për të siguruar drejtësi për të mbijetuarit e krimeve të tmerrshme të Jeffrey Epstein… Tani është koha që Shtetet e Bashkuara t’i japin fund kësaj mbulimi nga Shtëpia e Bardhë. Presidenti Trump dhe administrata e tij Epstein nuk janë mbi ligjin”, tha ai.

Ligjvënësit i kanë kërkuar Mountbatten-Windsor të shkojë në SHBA për të dëshmuar rreth lidhjeve të tij me Epstein. Sipas dokumenteve të publikuara së fundmi nga departamenti i drejtësisë, emri i Mountbatten-Windsor kishte qenë në radarin e zbatimit të ligjit në SHBA për 15 vjet para arrestimit të tij.

Maria Farmer, e cila ishte e mbijetuara e parë e njohur që raportoi Epstein dhe bashkëpunëtoren e tij Ghislaine Maxwell tha se është vetëm fillimi i llogaridhënies dhe drejtësisë.

“Le të kërkojmë tani që të gjitha dominot e pushtetit dhe korrupsionit të fillojnë të shemben,” shtoi ajo.

Në mënyrë të ngjashme, Marijke Chartouni, një tjetër e mbijetuar, tha se duhet të veprohet si policia britanike dhe Departamenti Amerikan i Drejtësisë të veprojë me vendosmëri.

 “Sikur Departamenti Amerikan i Drejtësisë të vepronte me kaq vendosmëri. Policisë britanike iu deshën më pak se tre javë nga publikimi i pjesës së fundit të dosjeve të Epstein për të arrestuar Andrew-n, duke i bërë Pam Bondi dhe Kash Patel të dukeshin gjithnjë e më të paaftë”, tha ajo.