Konjufca për vizitën e Spiropalit: Takimet tona janë vëllazërore, Shqipëria ka bërë hapa gjigantë sa u përket integrimeve evropiane

Zëvendëskryeministri i parë dhe ministri për Punët e Jashtme dhe Diasporën, Glauk Konjufca, teksa e quajti mike ministren për Evropën dhe Punët e Jashtme, e Shqipërisë Elisa Spiropali, tha se takimet me homologë shqiptarë janë vëllazërore.

Ai e ka përgëzuar Shqipërinë siç tha “hapa gjigantë që i ka bërë sa u përket integrimeve evropiane”.

Konjufca tha se sa më i fortë që të jetë koordinimi mes dy shteteve, aq më e sigurt do të jetë rruga tyre drejt Bashkimit Evropian.

Ai shtoi se në takim diskutuan sot për thellimin e mëtejshëm të bashkëpunimit politik dhe ekonomik mes Kosovës dhe Shqipërisë, për koordinim të plotë në politikën e jashtme dhe për forcimin e ndërtimit të kapaciteteve të brendshme diplomatike.

“Miken time Elisën. Takimet me homolog nga Shqipëria nuk janë si takime tipike bilaterale sepse ne, ndonëse kemi ministri të jashtme, Shqipëria dhe Kosova nuk janë të jashtme për njëra-tjetrën. Vendet tona janë shumë më tepër dhe takimet tona janë vëllazërore dhe takime të të njëjtit komb që më shumë si interesa ndërshtetërore e ndajnë fatin historik dhe politik”, tha Konjufca në konferencën e përbashkët.