​Nasuf Bejta, ish-rivali i presidentes: Osmani “perfekte” si presidente, meriton mandat të ri

Nasuf Bejta nuk ishte ndonjë emër me shumë peshë politike në Kosovë, deri në prill të vitit 2021.

Por, në këtë muaj, aktivisti dhe profesori nga Vushtrria, u bë i njohur për gjithë vendin, e përtej.

Kjo, me një vendim të rëndësishëm që ai mori, kur u pajtua të bëhej kandidat për president të vendit.

Bejta e dinte se këtë pozitë e post nuk e fiton dot, por e pranoi se e bëri këtë për faktin se ishte institucionalist dhe për hatër të Vjosa Osmanit, në mënyrë që ajo të bëhet presidente.

“Humbja” e vitit 2021 nuk e ka zhgënjyer. Ai për KosovaPress thotë se prapë do t’i hynte një aventure të tillë për të rikandiduar, jo për të fituar por për të çuar përpara procesin institucional, sigurisht, krejt kjo duke rezultuar me Vjosa Osmanin si të rizgjedhur presidente.

Duke e cilësuar atë si “perfekte” në ushtrimin e detyrës dhe duke theksuar se ajo e meriton edhe një mandat të dytë, Bejta e vendos theksin te stabiliteti politik dhe shmangia e zgjedhjeve të parakohshme, për çka thotë se Kosova nuk e ka luksin ta përballojë edhe një cikël elektoral të ri.

“Po, me apelin që mos të më votojnë mua, vetëm ta votojnë Vjosën dhe të dërgohet procesi përpara, përsëri pse jo? Nuk është turp me humbur prej një kandidati të mirë, e thashë, sepse është kjo fitorja e Kosovës. Nuk është fitorja e Vjosës e Albinit edhe e imja, po është e krejt popullit të Kosovës, e Kosovës vetë. Nuk e kemi luksin na gjithë këto harxhime, në këto rrethana, në këtë varfëri, përsëri na çdo katër-pesë zgjedhje nëpër një vit. Është e tepërt. Mendoj që është e tepërt edhe çka është mjaft, është mjaft”,deklaroi ai.

Bejta thotë se zgjedhja e Osmani si presidente e Kosovës, më 2021, ishte një përmbushje e vullnetit popullor dhe krijim i një “tandemi shumë të mirë” Kurti-Osmani, që sipas tij, pritej nga e gjithë popullata, pas zgjedhjeve të shkurtit të atij viti ku koalicioni i këtyre dyve mori pak mbi 50 për qind të votave.

“Meqenëse mu dha shansi që ta shpij procesin e zgjedhjes së presidentit, përkatësisht kompletimin e institucioneve të Kosovës, unë e mora atë guxim edhe me plot dëshirë, përkundër që e disha epilogun e krejt kësaj pune, po isha njeriu më i gëzueshëm më 4 prill kur u zgjodh edhe presidentja e Kosovës, mendoj që një presidente tamam meritore, një tandem shumë i mirë që krejt popullata e priste, tandemin Kurti-Osmani, dhe me shpresë dhe ndjenjë se këta do të jenë me të vërtetë ata që dinjitetshëm do ta udhëheqin shtetin. Sepse ishte edhe kërkesë gjithëpopullore”, tha Bejta.

Vjosa Osmani shërbeu 5 vjet si presidente e shtetit. Gjatë kësaj kohe, ajo dhe Bejta u takuan vetëm njeherë. Pavarësisht kësaj, ajo, sipas ish rivalit të saj “presidencial”, bëri gjithçka, në mënyrë perfektë, gjatë kësaj kohe

“Po në përgjithësi unë mendoj që Vjosa ka qenë perfekte. Përkundër, që ndoshta unë nuk kam pasur shumë takime me Vjosën. Një takim krejt pas zgjedhjes së saj si presidente, një takim kur jam bërë deputet, pesëminutësh, po unë mendoj që perfekte ka qenë. Mendimi imi personal. Ndoshta nuk e di si mendojnë të tjerët, por unë mendoj që mirë na ka përfaqësuar, unë mendoj që edhe në barazinë gjinore ka punuar shumë, edhe në mbrojtjen e institucioneve, mbrojtjen e ligjit. Detyrat e presidentit i ka kryer. Në ruajtjen e njohjeve, në kërkimin e njohjeve. Unë e konsideroj që ka bërë një punë shumë të madhe”, deklaroi ai.

Duke qenë se beson që Osmani punoi mirë, Bejta thotë se presidentja në detyrë e meriton edhe një mandat të dytë në krye të shtetit.

“Për mendimin tim, plotësisht e meriton që të kandidohet dhe është shumë keq nëse nuk kandidohet. Përkundër, thashë, të gjithave, unë mendoj se opinioni në Kosovë me shumicë është që Vjosa ta vazhdojë mandatin. Po në fund të fundit, në fund të fundit, unë mendoj që është një tandem i përkryer, prandaj i konvenon edhe Kurtit, edhe Kosovës që Vjosa të jetë edhe një herë kandidate. Nëse këta deputetë nuk e zgjedhin, atëherë kërkohet fajtori se kush po manipulon, kush po e zvarrit, kush po pengon në formimin e institucioneve”, deklaron Bejta.

Por, rizgjedhja e Osmanit për një mandat të dytë, nuk është e sigurt, të paktën deri të martën e 3 marsit. Politika po vlon këto ditë, në përpjekje për të gjetur një kandidat për president. Kryeministri Albin Kurti ka takuar liderët e dy partive më të mëdha opozitare për këtë cështje, por emri i Vjosa Osmanit nuk ka dal asnjëherë si propozim. Bejta thotë se kjo është ë pakuptimtë ndëra kritikon Kurtin që nuk po e shtyn përpara vazhdimin e mantatit të presidentes aktuale.

“Për mendimin tim janë takime të mundimshme edhe të pakuptimshme. 51.10% që ka fituar elektorati i Kurtit, unë mendoj që edhe opozita, edhe opozita, është dashur t’u thotë, si shumicë, “Urdhëroni, veç të bisedojmë, të pajtohemi politikisht për një kandidat që do të ishte i pëlqyeshëm edhe për opozitën”…Meqenëse kemi ngecur, po them, më pak se 72 orë derisa të zgjidhet presidenti, duhet me ardhur deri te zgjedhja e presidentit. Kisha bërë apel nga fshati im i lindjes, që mos të shkohet kurrsesi në zgjedhje, sepse nuk është zgjidhje”, deklaron Bejta.

Me 71 vota për, Kuvendi i Kosovës më 4 prill 2021 kishte zgjedhur Vjosa Osmanin në postin e presidentes së Kosovës me mandat pesëvjeçar.

Osmani fitoi në raundin e tretë të votimit, ku morën pjesë 82 deputetë. Kundërkandidati i saj, Bejta, nuk pati marrë besimin e asnjë deputeti.

Kuvendi duhet ta zgjedh presidentin e ri deri më 4 mars 2026, më së voni. Nëse kjo nuk ndodh, vendi shkon në zgjedhje të parakohshme.