“Kosova të jetë e përgatitur për bisedimet me Serbinë”
Deputeti i Partisë Social Demokrate (PSD), Faton Topalli, vlerësoi se Kosova me Serbinë nuk ka biseduar për tema që janë me rëndësi për qytetarët e vendit, por për tema të tjera.
“Gjatë procesit të bisedimeve, janë bërë lëshime, duhet që bisedimet me Serbinë të ndërpriten. Kemi pasur ndërhyrje të Serbisë në tema të brendshme të Kosovës, në vend se ne të merremi e të bisedojmë me minoritetin serb në Kosovë”, tha Topalli në RTK.
Topalli tha se Serbia ende nuk po pranon se Kosova është shtet i pavarur dhe sovran.
“Në të gjitha instancat Serbia ka treguar se nuk është e interesuar për të bashkëpunuar. Ka bërë të gjitha veprimet, duke shkuar edhe më larg që të kërkoj nga ato shtete që e kanë njohur Kosovën, të tërheqin njohjet”, tha ai.
Sipas tij, qytetarët e Kosovës, nuk janë armiq të popullit serb.
“Ne kemi pasur armik pushtetin serb”, theksoi ai.
Topalli ka kërkuar që të kemi qartësi dhe diskutim të brendshëm për bisedimet me Serbinë.
“Kemi shumë tema që janë me rëndësi, si tema e të pagjeturve që është më rëndësi për qytetarët e Kosovës”, theksoi ai.
Kurse deputeti i Nismës, Zafir Berisha, vlerësoi se janë bërë gabime në hapa.
‘Me Serbinë është biseduar, ekskluzivisht për funksionalitetin e shtetit të Kosovës. Përfaqësuesit e Kosovës, me një rezultat kanë marrë kompetencë. Edhe deputetët edhe qytetarët janë informuar nga mediat”, tha Berisha.
Ai ka vlerësuar se Serbia ende e konsideron Kosovën pjesë të saj. Berisha deklaroi se kanë pranuar platformën për bisedimet me Serbinë.
“Kjo platformë është një radhitje e fjalëve. Pra është një retorikë e përsëritur në veten dëshirore. Kjo platformë si ka ardhur që në fillim është për neve është e papranueshme, kur kemi edhe autorizim që presidenti i Kosovës, t’i udhëheq bisedimet”, tha ai. Sipas tij duhet të kemi debat të brendshëm, pasi që po flitet për fatin e vendit.
Ndryshe deputetja e LDK-së, Valentina Bunjaku pasi që ka konfirmuar pjesëmarrjen në emisionin e RTK-së, më vonë ajo ka anuluar pjesëmarrjen në debat, me arsyetimin se LDK –ja nuk ka qëndrim ende për bisedimet me Serbinë.
