Aca (Vuçiqi) – dirigjenti i propagandës antishqiptare!
Deklarata e Zorica Stojanoviqit për Telegrafin serb se biri i saj Stefani 11 vjeç është goditur nga plumbi “rikoshet”, tregon se nuk kemi të bëjmë me vrasje në tentativë. Aca (Vuçiqi) në Instagramin e tij shpreh një ‘reservatio mentalis”. Nuk e kualifikon veprimin. E zë në gojë vetëm fjalën “lëndim”.
Nga: Agim Muhaxheri
Krismat në Gotovushë të Shtërpcës, ku u lënduan dy të rinj serbë, njëri 11 tjetri 21 vjeç, jehuan në Beograd. I pari i Serbisë Aca (Vuçiqi) dhe papagajtë e tij aktivizuan propagandën e tyre antishqiptare.
I dyshuari Azem Kurtaj, 33, nga Gabrrica e Kaçanikut – vetëdorëzohet në Prevallë. Ai pak minuta pas krismave, përmes telefonit i ka deklaruar gazetës elektronike Indeksonline: Unë jam i pafajshëm… Po i dorëzohem policisë…
Kurtaj, pjesëtari i FSK-së, mbahet brenda grilave.
Në shenjë revolte serbët e Shtërpcës bllokojnë rrugën me vetura, drunj dhe gjësende tjera duke ndezur zjarrin…
Pas disa orësh zhbllokohet rruga.
E ëma e 11 -vjeçarit të plagosur, Zorica Stojanoviq i ka deklaruar Telegrafit serb se i dyshuari nga makina e tij në lëvizje ka shtënë në asfalt dhe nga dëbimi i plumbit është qëlluar i biri i saj Stefani…
Zorica tregoi një fakt me rëndësi në ndriçimin e së vërtetës me të cilin do të merren hetuesit, prokurorët dhe gjykatësit.
Kur dikush shtie në ndonjë objekt dhe ‘plumbi fluturon’ e godet ndonjë person, kësaj në drejtësi i thonë “rikoshet” (frëngjisht – ricocher).
Në rastin konkret nuk bëhet fjalë për vrasjen në tentativë, ngase dihet cilat janë atributet e kësaj vepre penale.
Nuk do mend – dilemat do t’i heq ekspertiza balistike.
Pas asaj çfarë ndodhi në Gotovushë të Shtërpcës, reagoi si vetëtima i pari i Serbisë, Aca (Vuçiqi). Në Instagramin e tij ai shpreh një “reservatio mentalis”, nuk e kualifikon veprimin. E zë në gojë togfjalëshin: “Shqiptari nga Kosova e Metohia lëndoi vogëlushin serb…”.
Kush është Azem Kurtaj ?
Azemi është i biri i dëshmorit Danush Kurtaj, i vrarë në masakrën e burgut të Dubravës, më 1999;
Nipi i luftëtarit të UÇK-së, Xheladin Kurtaj, i cili bashkë me Agim Bajramin e Besnik Beguncën bien në Gabrricë, më 30 gusht 1998.
Komentuesi Milazimi (Krasniqi), baba i Memli reperit, i del trenit përpara, bën politikë. Paragjykon, shpreh dilemën se i dyshuari Kurtaj ‘mund të ketë lidhje me Albin Kurtin…”. Shihe ti, me Albin Kurtin !
Pikësynim i tij – ta baltos Albin Kurtin dhe t’i bëj një argat pa pare propagandës së Beogradit.