Ahmeti: Nuk kemi dhënë leje për hedhjen e fishekzjarrëve (Dokument)

Disa OJQ mjedisore dhe palë të tjera të interesit kanë ngritur zërin kundër paralajmërimit se gjatë një koncerti të një banke në Prishtinë do të ndizen një sasi e konsiderueshme e fishekzjarrëve.

Kryetari i Prishtinës, Shpend Ahmeti ka sqaruar se lejen për fishekzjarrë nuk e ka lëshuar, pasi nuk është kompetencë e komunës, por e Ministrisë së Punëve të Brendshme dhe Policisë, transmeton Indeksonline.

I pari i kryeqytetit përmes një shkrimi në facebook ka sqaruar në hollësi këtë çështje, duke i bashkangjitur edhe ligjin dhe lejen e lëshuar për koncert, por jo edhe për fishekzjarre.

Postimi i plotë:

Sa për sqarim edhe njëherë:

Komuna e Prishtinës nuk lëshon leje për fishekzjarre sepse nuk ka kompetencë. Po e bashkangjes edhe ligjin edhe lejen që e kemi lëshu për koncertin.

Çdo vit ProCredit organizon koncertin e përvjetorit me artistë të njohur dhe çdo vit ne kemi lëshuar pëlqimin me kushtin që të marrin lejen e Universitetit te Prishtinës. Për mjete piroteknike i kemi drejtuar tek MPB dhe policia sic e kërkon Ligji.

Në Prishtinë, PCB ka financuar dy parqe të mëdha, në Dardani dhe Heroinat. Për këtë, i falenderojmë.

Edhe në këtë rast Prishtina do të ishte falenderuese nqs paratë e fishekzjarreve do të mund të shpenzoheshin për mbjellje të drunjve shtesë.

I përkrahim iniciativat qytetare por do të ishte mirë që të niset një e përgjithshme për mjetet piroteknike. Mjafton të bëhet një hulumtim për importin e mjeteve dhe po ashtu për lejet që lëshohen për çdo javë. Dhe të krahasohen edhe me shtetet e tjera.

Por, nuk mund ti kuptoj shpifjet e ish kolegëve të mi që çdo ngjarje mundohen me keqpërdor për sulme. Vitin e kaluar kanë qenë 3000 kg në evenimentin e njejtë ku edhe kanë qenë nëpër drejtori dhe nuk ka pas asnjë reagim. Sivjet për 1000 kg nuk lanë fjalë pa shpif.