Arbnor Morina: Me futboll dhe tifozëri i dhamë leksion Malit të zi

Kosova mbrëmë bëri një ndeshje të madhe duke e mposhtur Malin e zi me rezultat 2-0 në kualifikueset për Euro 2020.

“Dardanët” treguan se janë dukshëm më lartë se kundërshtari, si në lojë ashtu edhe në tribuna.

Trajneri i njohur kosovar, Arbnor Morina në një prononcim për Indeksonline e ka vlerësuar me notën “10” paraqitjen e skuadrës së Challandes.

“Ndeshje shumë e mirë në të gjitha aspektet, që nga mikpritja, loja dhe përcjellja, një 10 e pastër. Brenda lojës ka pasur shumë stabilitet, sidomos në mbrojtje“, ka thënë Morina.

“Por ngarkesa e lojës ka bërë që te këtë nervozizëm pak më tepër se ç’duhet dhe e kemi paguar me kartonë të verdhë pa nevojë“.

Ai ka thënë se Kosova e ka humbur një mundësi shumë të mirë për ta përmirësuar golaverazhin.

“Aksionet kanë qenë të rrjedhshme dhe të punuara me paramendim, por na mungoi efikasiteti më i madh. Këtë po e them se kemi pasur rastin të përmirësojmë golaverazhin i cili ndoshta mund të na nevojitet. Djemve dhe trajnerëve edhe një herë bravo e madhe për lojë“.

Trajneri ka vlerësuar lartë edhe paraqitjen në tribuna të tifozëve të Kosovës.

“E Dardanët dhe publiku kanë treguar edhe këtë herë një shkallë të lartë të qytetarisë me brohoritjet e tyre“, ka përfunduar Morina.

Kosova tani ka edhe dy ndeshje, dy finale që të mund të siguroj kualifikimin në Europian. /IndeksOnline/