ASHNA demanton autoritetet serbe: Fluturimet janë duke u realizuar në bazë të planit

Agjencia e Shërbimeve të Navigacionit Ajror (ASHNA) ka njoftuar se të gjitha operimet janë duke u zhvilluar normalisht dhe në bazë të dinamikës së planifikuar, përkundër dezinformatave nga ana e Autoritetit të Aviacionit Civil të Serbisë, se Aeroporti Ndërkombëtar i Prishtinës është i mbyllur për Aviacion Civil.

Përmes një komunikate, ASHNA ka bërë të ditur se kjo nuk është hera e parë që autoritetet serbe dezinformojnë operatorët me të tilla informata por këtë e kanë bërë vazhdimisht, transmeton Indeksonline.

“Autoritetet Serbe, kanë shkuar edhe më teje, ku në publikimin e tyre të Informacionit Aeronautik kanë të publikuar një shtojcë, ku theksohet se Aeroporti i Prishtinës është i mbyllur për trafik civil nga Maji i vitit 1999, me këtë, ata (AAC e Serbisë) kanë ndaluar përdorimin e hapësirë ajrore të Serbisë për fluturimet që kanë për destinim Aeroportin Ndërkombëtar të Prishtinës apo anasjelltas”, thuhet në komunikatë.

ASHNA njofton se, lejet për operime jepen nga Republika e Kosovës dhe se dezinformatat e autoriteteve serbe nuk kanë më ndonjë ndikim në këtë aspekt.

Sipas ASHNA, se të gjitha fluturimet janë duke u realizuar sipas planifikimit, tregon edhe fakti se deri në ora 15:30 janë realizuar 36 fluturime, prej tyre 16 fluturime në ardhje dhe 20 në shkuarje. /Indeksonline/