Dalin pamjet nga ekzekutimi i 40-vjeçarit në Vlorë, dy autorët po e prisnin në kthesë
Kamerat e sigurisë të karburantit përballë kanë ndihmuar për të zbardhur të gjithë skemën e plotë të ekzekutimit të Bledar Birçajt mesditën e kësaj të hëne në Vlorë, në zonën e quajtur ‘Bishti i Kalldrëmit’.
Siç shihet në pamje e publikuara sot në emisionin ‘Opinion’, viktima po udhëtonte me mjetin “BMW”, teksa një makinë tjetër ngjyrë të bardhë po i priste e parkuar. Sapo mjeti BMW ka mbërritur pranë karburantit, dalin nga makina 2 persona, të maskuar e të armatosur duke qëlluar me breshëri në drejtim të shoferit dhe më pas kanë nxituar që të largohen nga vendi i ngjarjes. Në tentativë e sipër duke u larguar, një prej autorëve i bie arma nga duart dhe kthehet për ta marrë pas shumë pak sekondash.
Nga makina e Birçajt, del një person, i cili me vrap largohet teksa në duar mban diçka, që është e vështirë për t’u dalluar në pamje. Ky person është dëshmitari kyç i kësaj ngjarjeje të rëndë. Ai është ndaluar nga policia, ku është marrë në pyetje. E gjithë skena ka ndodhur në mes të ditës, rreth orës 13:00, ku shihet që ky moment ka shkaktuar panik të madh te qytetarët që po kalonin dhe drejtuesit e mjeteve.
Pista kryesore e hetimit janë konfliktet që 40-vjeçari mund të ketë pasur në Spnjë, prej nga ishte kthyer prej mëse 1 muaji. Në drejtim të automjetit është qëlluar mbi 10 herë ndërkohë që në trupin e viktimës mendohet se janë konstatuar deri në 7 plumba duke e lënë të vdekur në vend.
Momenti kur 2 personat e armatosur qëllojnë në drejtim të BMW ku po udhëtonte Bledar Birçaj
Momenti kur shoqëruesi i 40-vjeçarit largohet me vrap nga vendi i ngjarjes
Momenti kur njërit nga autorëve i bie arma nga duart
Momenti ku largohen autorët me makinën tip BENZ me xhama të zinj
Kush ishte Bledar Birçaj? Emri i tij nuk është një emër i panjohur për policinë, pasi në vitin 2011 është arrestuar në Vlorë si i dyshuar për vrasje duke iu vendosur masa e arrestit me burg me afat 45 ditë. Birçaj sakaq rezulton edhe pronar i një biznesi në Vlorë. Një tjetër ngjarje ku ka qenë subjekt institucioneve ligjzbatuese është ajo e vitit 2010, kur Birçaj së bashku me vëllanë e tij kanë dhunuar juristin e Zyrës Vendore të Regjistrimit të Pasurive të Paluajtshme, personin me inicialet F. H. Për këtë në atë kohë prokuroria nisi procedim penal në gjendje të lirë për dy të rinjtë.