E konfirmon Kurti: Nesër betohen kryetarët e komunave veriore

Kryeministri i vendit, Albin Kurti, ka bërë të ditur se nesër do të betohen kryetarët e Zubin Potokut, Zveçanit dhe Leposaviqit.

Këtë njoftim, Kurti e dha përgjatë mbledhjes së Qeverisë.

“Nesër, në ndërtesa publike në këto komuna, do të mbahen seancat konstituive dhe betimi edhe i tre kryetarëve të rinj të Zveçanit, Zubin Potokut dhe Leposaviqit.

Kanë kaluar mbi 6 muaj prej kur këto katër komuna mbetën pa kryetarë. Dy prej tyre edhe pa kuvende. E banorët atje, pa shërbime komunale. Kjo nuk është normale” tha Kurti.

Kryetarët e këtyre tri komunave nuk janë betuar akoma, pavarësisht se janë zgjedhur nga vullneti qytetar, në zgjedhjet e jashtëzakonshme të 23 prillit.

Zgjedhje të jashtëzakonshme ka pasur edhe në Komunën e Mitrovicës së Veriut, me kryetarin e zgjedhur Erden Atiq, i cili u betua të premten e kaluar.