Haradinaj: Serbia po rrënon çdo komunikim normal me Kosovën

Pas ndalimit të fotografive të artistes kosovare Eliza Hoxha, ka reaguar edhe kryeministri i vendit, Ramush Haradinaj.

Përmes një statusi në facebook, ai ka thënë se autoritetet serbe me këtë akt po rrënojnë ato pak mundësi për vendosjen e komunikimit normal me Kosovën, shkruan Indeksonline.

Sipas Haradinajt, kjo është në kundërshtim me frymën dhe vlerat evropiane.

Ky është postimi i plotë:

Autoritetet serbe me aktin e ndalesës në kufi të artistëve kosovarë, të ftuar në festivalin “Mirëdita, dobar dan” në Beograd, po rrënojnë edhe ato pak mundësi për vendosjen e një komunikimi normal me Kosovën, qoftë edhe përmes artit, si gjuhë universale.

Artistët dhe të rinjtë nga Kosova po i nënshtrohen bastisjes së rreptë në kufi me Serbinë, ku policia serbe ua ka bërë me dije se dy ekspozita nuk do të lejohen për shkak të përmbajtjeve artistike të tyre.

Me pengimin e lëvizjes së lirë të njerëzve dhe ideve, Serbia po e minon normalizimin e marrëdhënieve me Kosovën, që është në kundërshtim me frymën dhe vlerat europiane.

RH