11:29 / E Enjte, 24 Shtator 2020

Hoti i kundërpërgjigjet VV-së për anulimin e mbledhjes në Shqipëri: Agjendën e caktoj vetëm unë

Kryeministri i Kosovës, Avdullah Hoti, dje ka njoftuar se për shkak të seancës së Kuvendit të Kosovës, ka shtyrë mbledhjen e përbashkët me Qeverinë e Shqipërisë, të paraparë për këtë të premte.

I menjëhershëm ishte reagimi i deputetëve të Lëvizjes Vetëvendosje të cilët kërkuan që të mos e anulojë këtë mbledhje, pasi Kuvendi e pret, shkruan IndeksOnline.

Hoti sot në një konferencë shtypi iu përgjigj VV-së  duke thënë se agjendën e Qeverisë e cakton vetëm ai dhe askush tjetër.

Kryeministri ka vlerësuar se nesër është një mbledhje e rëndësishme në Kuvend ku do të shqyrtohet Ligji për rimëkëmbjen ekonomike.

“Arsyetimin pse e kemi shtyrë këtë mbledhje e kam dhënë dje dhe e kemi bërë në koordinim me kryeministrin Rama.

Agjendën e Qeverisë e caktoj vetëm unë, askush tjetër. Nesër është një mbledhje shumë e rëndësishme në Kuvend, ku  ndër pika është edhe Ligji më i rëndësishëm për rimëbëkmbëjn ekonomike dhe unë duhet të jem aty së bashku me deputetët në Kuvend për ta çuar përpara këtë ligj.

 Ndërkohë ne e kemi spostuar këtë mbledhje vetëm për një javë, nuk ka asnjë çështje aq urgjente që të mos spostohet”, tha ai./IndeksOnline/