Konsulli i shkarkuar mbrëmë nuk e njeh vendimin e Vjosa Osmanit

Ndër katër konsujt eë shkarkuar mbrëmë nga u.d. e presidentes Vjosa Osmani-Sadriu, është edhe Lindon Kqira, konsulli i Kosovës në Shkup.

Ky i fundit nuk e njeh vendimin e Osmanit pasi e quan tendencioz, arbitrar, vendim politik dhe përçarës, e mbi të gjitha thotë se është antikushtetues dhe i paprecedent në diplomacinë e Kosovës.

“Nuk e njoh vendimin arbitrar dhe politik të u.d. së presidentes Osmani. Me vetëdije dhe përgjegjësi të plotë, deklaroj se nuk njoh dhe as nuk e perfilli vendimin për shkarkimin tim, nga pozita e konsullit-ministrit këshilltar, në Ambasadën e Republikës së Kosovës, në Shkup, nga zonja Vjosa Osmani, kryetare e Kuvendit të Kosovës dhe u.d. e presidentes së Republikës së Kosovës. Ky vendim në radhë të parë është tendencioz, arbitrar, vendim politik dhe përçarës, e mbi të gjitha është antikushtetues dhe i paprecedent në diplomacinë e Kosovës”, thuhet në reagimin e Kqirës, i cili ka arritur në emailin e redaksisë së IndeksOnlinet.

Ai thotë se zonja Osmani do duhej të merrej me punën e Kuvendit të Kosovës, i cili që nga ardhja e saj në krye të këtij kuvendi, në mënyrë aksidentale, është e vlerësuar si legjislatura më e dështuar e Kosovës nga themelimi i Kuvendit të Kosovës e deri sot.

“Neglizhenca e situatës me pandeminë globale, kriza ekonomike, miratimi i Ligjit për rimëkëmbjen ekonomike dhe një varg ligjesh tjera jetike për qytetarët e Kosovës do duhej të ishin në agjendën e saj dhe jo shkarkimet arbitrare, antikushtetuese me qëllim të destabilizimit politik dhe futjes së hutisë në shërbimin diplomatik të Kosovës, në Shkup dhe kudo, për qëllime hakmarrejeje dhe të profiterizmit politik”, ka thënë ai.

Kqira thotë se vendimi i u.d. së presidentes së Republikës së Kosovës për shkarkimin e tij, është nxjerrë në kundërshtim me nenin 84 të Kushtëtutes së Republikës së Kosovës, ngase Osmani këtë vendim e ka marrë pa konsultim paraprak me MPJD-në dhe Qeverinë e Republikës së Kosovës.

“Në këto rrethana, kushdo që bënë përpjekje me zbatue këtë vendim të njëanshëm, përfshihet në shkelje Kushtetuese. Veprimet e mia karshi këtij vendimi, do të jenë në përputhje me dispozitat ligjore dhe Kushtetutën e Republikës së Kosovës dhe paralajmroj se kundër këtijë vendimi arbitrar të kryekuvendares, Osmani, do ta ndjekim rrugën ligjore, ndërsa unë do të vazhdoj normalisht punën dhe angazhimet ditore në Ambasadën e Republikës së Kosovës në Shkup”, ka deklaruar ndër të tjera konsulli i shkarkuar mbrëmë nga Osmani-Sadriu./IndeksOnline/