Koreja e Veriut zotohet të forcojë arsenalin e saj bërthamor, si në cilësi, ashtu edhe në sasi
Liderët e Koresë së Veriut kanë paraqitur gjithashtu plane për të përshpejtuar ndërtimin e bazave moderne detare dhe për të modernizuar sistemet luftarake, sipas agjencisë shtetërore KCNA.
Pheniani është zotuar të forcojë forcën e tij bërthamore “në cilësi dhe sasi” dhe të zgjerojë rolin e agjencisë së inteligjencës, raportuan të premten mediat shtetërore të Koresë së Veriut.
Gjatë një mbledhjeje të Komisionit Qendror Ushtarak të Partisë së Punëtorëve të enjten, udhëheqësit e Koresë së Veriut diskutuan planet për modernizimin e forcave të armatosura të vendit. Udhëheqësi suprem Kim Jong un deklaroi se vetëm një ushtri e fuqishme mund të garantojë “paqen e vërtetë”, sipas agjencisë KCNA.
“Takimi propozoi detyra dhe mënyra për zgjerimin në shumë drejtime të funksioneve dhe misioneve të Byrosë së Përgjithshme të Zbulimit dhe Inteligjencës, e cila luan një rol kyç në kontrollimin e kërcënimeve nga armiqtë e mundshëm dhe mbledhjen e informacioneve thelbësore, si edhe në rritjen rrënjësore të kapaciteteve të saj për zbulim dhe aktivitete të inteligjencës ushtarake”, raportoi KCNA.
Komisioni gjithashtu paraqiti plane për të përshpejtuar ndërtimin e bazave moderne detare dhe për të modernizuar sistemet luftarake.
Sipas Shërbimit të Kërkimeve të Kongresit të SHBA-së, Pheniani ka zhvilluar programin e tij bërthamor gjatë dekadës së fundit, duke paraqitur një kërcënim në rritje për Shtetet e Bashkuara dhe Azinë Lindore.
Koreja e Veriut ka kryer gjashtë teste të konfirmuara të armëve bërthamore që nga viti 2006.
Ky zhvillim vjen pasi muajin e kaluar një ushtar i Koresë së Veriut u raportua se u vu në paraburgim në Korenë e Jugut, pasi kaloi zonën e çmilitarizuar që ndan dy vendet.
Shefat e përbashkët të shtabit të Koresë së Jugut deklaruan se ushtria “ka marrë në kujdestari një ushtar të Koresë së Veriut në vijën qendrore të frontit” dhe se autoritetet po hetojnë rrethanat e ngjarjes, sipas agjencisë së lajmeve Yonhap.
Zona e çmilitarizuar është një nga kufijtë më të ruajtur në botë, e fortifikuar me tela me gjemba, mina tokësore dhe sisteme të shumta vëzhgimi.
Ministria e Unifikimit e Koresë së Jugut thotë se më shumë se 34 mijë shtetas të Koresë së Veriut, përfshirë 899 ushtarakë, kanë dezertuar në jug që nga fillimi i mbajtjes së statistikave në vitin 1998, shkruan Euronewsi.
