Kryetari i Supremes takon gjyqtarët për krime të rënda, flasin për korrupsionin në Kosovë

Kryetari i Gjykatës Supreme, Enver Peci, njëherësh kryesues i Komisionit konsultativ për politikë ndëshkimore, ka nisur sot takimet me gjyqtarët e departamenteve për krime të rënda, për të diskutuar lidhur me veprat penale të korrupsionit.

Me mbështetjen e Ambasadës amerikane në Kosovë, Gjykata Supreme ka përgatitur një draft udhëzues: “Korrupsioni zyrtar dhe veprat penale kundër detyrës zyrtare”, i cili është elaboruar para gjyqtarëve.

Në njoftim thuhet se ky udhëzues qartëson disa prej elementeve kyç të këtyre veprave, përfshirë pikënisjen specifike, rrethanat lehtësuese dhe rënduese, arsyetimin, dënimet plotësuese, ndalimin e ushtrimit të profesionit, konfiskimin e përfitimit, caktimin e dënimit varësisht prej veprës penale lidhur me korrupsionin zyrtar etj.

Takimi i parë po zhvillohet me gjyqtarët e Departamentit për krime të rënda të Gjykatës Themelore në Prishtinë, ndërkaq ditëve në vijim takimet e tilla do të zhvillohen nëpër të gjitha gjykatat themelore në vend, si edhe në Gjykatën e Apelit.