Kush thotë se Albini bën opozitë, me shtetin e me demokracinë?
Albin Kurti po bën opozitëbërjen me shtetin e Kosovës dhe me qytetarët e saj. Kështu ka thënë këshilltarja e kryeministrit në detyrë, Ramush Haradinajt, Meliza Haradinaj-Stublla. Ajo ka thënë se Kurti e ka vendosur veten para demokracisë dhe se ai është tregtar politik. “E turpshme se si Albini po vazhdon opozitëbërjen me shtetin e Kosovës dhe me qytetarët e saj.
Sovrani ia dha mandatin për kryeministër, ai bën hajgare me të. Bën hajgare me procedurat kushtetuese dhe me rregullat e demokracisë. I dhunon e përçmon ato si të ishte diktator.
Albin, nominimi për mandatar nuk dërgohet në Presidencë pa i pasë numrat e dakorduar – përveç nëse qëllimi yt është të shkaktosh akoma më shumë vonesa, e ta dërgosh vendin ne zgjedhje prapë! Shansën e dhënë nga LDK-ja e refuzove paturpësisht, për një pozitë të kryeparlamentarit, të cilën e fitove me tregti për t’a kompensuar koncesionin që e bëre me postin e Presidentit.
Aftësitë tua për të tregtuar pozita për pushtet i përjetuam kur dëgjuam se si tentoje të përfitosh duke ofruar ‘heqjen dorë’ nga emrat e të nominuarve për zvKM të dytë, Ministër të Jashtëm, e Ministre të Ekonomisë. Këtë aftësi e vullnet tregtar nuk mund ta fshehësh me kundërshtimin taktik të heqjes dorë nga pozita e Kryeparlamentarit. Tani po të njohim të gjithë, por ata që besuan në ty, nuk po munden me e përcjellë e me pranu shpejtësinë e ç’mitizimit tënd.
Po e përsëris që në demokraci, me vetëm 26% nuk mund t’i marrësh të gjitha. Të gjitha urat që i ke rrënuar dje, do të jetë e pamundshme t’i ndërtosh brenda natës për të kaluar lumin e të bëhesh kryeministër.
Kur e vendos veten para demokracisë, përfundon si sot në atë video: i dëshpëruar duke mohuar të dyja! Paç veten në qafë”, ka thënë Meliza Haradinaj-Stublla.