Lakers mposhtet nga Orlando, Toronto vazhdon kryesimin në lindje
Vijon sezoni me luhatje i skuadrës së Lakers, që dje u mundën 108-104 në fushën e tyre nga Orlando. Një ndeshje me dy pamje, e mirë për kalifornianët në pjesën e parë, me LeBron James që realizoi 24 pikë. Por në të dytën erdhi përmbysja e miqve, me Vucevic që realizoi 31 pikë e 15 rebound, ndërkohë që 42 pikë u realizuan nga lojtarët e stolit. Fitore të lehtë korri Utah Jazz, që mundi 133-112 Sacramento, sfidë e komanduar nga miqtë, me 6 lojtarë që realizuan mbi 10 pikë (Rubio 27 pikë).
Në Lindje vijon të komandojë skuadra e Toronto, që mundi 125-115 Miami, ndeshje e dominuar nga basketbollistët e ekipit kanadez. Leonard me 29 pikë ishte shënuesi më i mirë, mbështetur nga Siakam me 21 (7 lojtarë të Raptors realizuan mbi 10 pikë). Fitore në sekondat e fundit korri Atlanta, që mundi 124-123 Charlotte, ku vendimtar me koshin e tij ishte Collins (23 pikë e 11 rebound). E njëjta situatë edhe në fitoren 127-125 të Philadelphia ndaj Brooklyn, ku u dalluan Jimmy Butler me 34 pikë e 12 rebound e Embiid me 32 pikë e 12 rebound.
NBA – Rezultatet e sotme
Lakers – Orlando, 104-108
Detroit – Phoenix, 118-107
Atlanta – Charlotte, 124-123
Brooklyn – Philadelphia, 125-127
Memphis – New York, 98-103
Toronto – Miami, 125-115
Sacramento – Utah Jazz, 112-133
Portland – Clippers, 100-104