Limaj tregon kujt i takojnë meritat për demarkacionin, përmend edhe LDK-në

Zëvendëskryeministri i Kosovës, Fatmir Limaj ka thënë se Lista Serbe nuk ka votuar asgjë në këmbim për ta votuar marrëveshjen për demarkacion me Malin e Zi. Numri dy i Qeverisë Haradinaj ka thënë se deputetët kanë pasur dilema dhe po punojnë që t’i heqin këto dilema.

Ka thënë se nuk janë ndalë për asnjë moment dhe janë duke punuar me të gjitha Grupet Parlamentare për të arritur shumicën e nevojshme të votave.

“Njerëzit kanë nevoje t’i hiqen dilemat dhe pres që shumica e Kuvendit të pajtohen dhe ta mbyllin këtë temë.

“Marrëveshja me Malin e Zi u ka dhënë mundësinë deputetëve të mos votojnë me hezitime por t’i ipet mundësi korrigjimit të nevojshëm aty ku ka pasur gabime ose lëshime. Unë pres që të gjithë deputetët ta votojnë. Unë pres që këtë javë të mbyllet çështja e demarkacionit dhe kjo javë është shumë e rëndësishme ta mbyllim këtë temë”, ka thënë Limaj në një intervistë për televizionin publik.

Më tutje, Limaj ka thënë se pas ratifikimit të demarkacionit, do të formohen grupet punuese të dy shteteve të cilat do të dalin në teren dhe do t’i ballafaqojnë faktet.

I pyetur se kujt i takojnë meritat për konsensusin e arritur për demarkacionin, Limaj ka thënë se i takojnë të gjithëve duke shtuar se Qeveria e ka për detyre të punojë për konsensus.

Limaj ka thënë se edhe LDK ka kontribut për arritjen e konsensusit për demarkacionit.

Ai ka thënë se nuk flet në vetën e parë për këtë çështje.