Lirisë nuk i ndihmojnë as transferimet e reja as përkrahja e tifozëve, Ballkani triumfon në Prizren

Ballkani e ka nisur me fitore sezonin pranveror në Superligën e Kosovës.

Kampioni në fuqi dhe lideri aktual, shënoi fitore në udhëtim ndaj Lirisë, me rezultat 3-0, shkruan IndeksOnline.

Skuadra e Ilir Dajës kishte epërsinë qysh nga minuta e 22-të, kur Gentrit Halili e dërgoi topin në rrjetë për herë të parë.

Almir Kryeziu dyfishoi rezultatin në minutën e 59-të, ndërsa Armend Thaqi vulosi fitoren në minutën e 86-të.

Me këtë fitore, Ballkani mbetet lider i Superligës me 43 pikë, gjashtë më shumë se Llapi.

Në anën tjetër Liria përkundër përforcimeve të shumta dhe përkrahjes së madhe nga tifozët në ndeshjen e sotme, nuk po arrin të këndellet as sezonin pranveror.

Skuadra prizrenase është e fundit në tabelë, me vetëm 9 pikë të grumbulluara./IndeksOnline/