Miliarderja vietnameze denohet me vdekje për mashtrim me kredi 44 miliardë dollarëshe

U mbajt gjyqi më spektakolar ndonjëherë në Vietnam, që i përgjigjet një prej mashtrimeve bankare më të mëdha që bota ka parë ndonjëherë, shkruan BBC.

Një investuese vietnameze 67-vjeçare u dënua me vdekje të enjten, për grabitjen e një prej bankave më të mëdha të vendit gjatë një periudhe 11-vjeçare.

Vendimi është i rrallë! Truong My Lan është një nga gratë e pakta në Vietnam që është dënuar me vdekje për një krim.

Truong My Lan u dënua për marrjen e 44 miliardë dollarëve në kredi nga Banka Tregtare Saigon.

Vendimi kërkon që ajo të kthejë 27 miliardë dollarë, një shumë që prokurorët thanë se mund të mos rikthehet kurrë, transmeton Indeksonline.

Sipas autoriteteve, 2 mijë e 700 njerëz u thirrën për të dëshmuar, ndërsa 10 prokurorë të shtetit dhe rreth 200 avokatë ishin të përfshirë.

Provat ishin në 104 kuti që peshonin gjithsej gjashtë tonë. Tetëdhjetë e pesë të tjerë u gjykuan me Truong My Lan, e cila mohoi akuzat.

Të gjithë të pandehurit u shpallën fajtorë. Katër morën burg të përjetshëm. Të tjerëve iu dhanë dënime me burg nga 20 vjet me deri në tre vjet me kusht.

Truong My Lan vjen nga një familje kino-vietnameze në qytetin Ho Chi Minh, dikur Saigon.

Ka qenë prej kohësh “motori” tregtar i ekonomisë vietnameze.

Ajo filloi karrierën si shitëse tezge në treg, duke shitur kozmetikë me nënën e saj, por filloi të blinte toka dhe prona pasi Partia Komuniste nisi një periudhë reformash ekonomike, të njohur si Doi Moi, në vitin 1986. Në vitet 1990, ajo zotëronte një portofol të madh hotelesh dhe restorantesh.

Deri në vitin 2011, Truong My Lan ishte një figurë e njohur biznesi në qytetin Ho Chi Minh dhe asaj iu lejua të organizonte bashkimin e tre bankave më të vogla, të kufizuara në para në një entitet më të madh: Saigon Commercial Bank.

Ligji vietnamez ndalon çdo individ që të mbajë më shumë se 5% të aksioneve në çdo bankë. Por prokurorët thonë se përmes qindra kompanive guaskë dhe njerëzve që vepronin si përfaqësues të saj, Truong My Lan zotëronte në fakt më shumë se 90% të Saigon Commercial.

Shumat e nxjerra janë marramendëse. Kreditë e saj përbënin 93% të të gjithë huadhënies së bankës.

Sipas prokurorëve, gjatë një periudhe prej tre vjetësh nga shkurti 2019, ajo urdhëroi shoferin e saj të tërhiqte 108 trilion dong vietnamez, më shumë se 4 miliardë dollarë, para nga banka dhe ta ruante në bodrumin e saj.

Ajo u akuzua gjithashtu për ryshfet, për t’u siguruar që kreditë e saj nuk do të shqyrtoheshin kurrë. Madje, edhe një ish-kryeinspektor në bankën qendrore u dënua me burgim të përjetshëm për marrjen e ryshfetit prej 5 milionë dollarësh.