Mori ryshfet, një vit burg për ish-zyrtarin e Gjilanit

Gjykata Themelore në Gjilan ka shpall aktgjykim dënues ndaj të akuzuarit B. B., në kohëzgjatje prej 1 (një) viti burgim dhe dënim me gjobë në shumën 1.000 (njëmijë) euro.

Sipas njoftimit, i akuzuari në cilësinë e personit zyrtar në Drejtorinë për Buxhet dhe Financa të Komunës së Gjilanit, në mënyrë të drejtpërdrejt ka kërkuar dhe pranuar ryshfet në shumën prej 2.000 euro nga i dëmtuari A. E., në mënyrë që të bëjë pagesën nga llogaria e komunës për shpronësimin e tokës në vlerë prej 65.072 euro, transmeton Indeksonline.

Me këto veprime i akuzuarit ka kryer veprën penale marrje e ryshfetit nga neni 428 paragrafi 1 të Kodit Penal të Republikës së Kosovës (KPRK).

Pas pranimit të fajësisë nga i akuzuari, gjykata ka dënuar me një vit burgim dhe 1.000 euro gjobë, gjithashtu të akuzuarit i është shqiptuar edhe dënimi plotësues ndalimi i ushtrimit të funksioneve në administratën publike ose shërbimin publik në kohëzgjatje prej një viti, pas mbajtjes së dënimit me burgim.  /Indeksonline/