MPB: Aksioni në veri tu besohet vetëm organeve të drejtësisë, mos bëni deklarata politike

Ministria e Punëve të Brendshme nëpërmjet një komunikate për media ka kërkuar që aksioni i sotëm në veri duhet t’u besohet vetëm organeve të drejtësisë në Kosovë dhe që në asnjë formë të mos bëhen deklarime politike me qëllim të pengimit të drejtësisë.

“Ministria e Punëve të Brendshme dhe ministri, Ekrem Mustafa, mbeten të angazhuar në përkrahjen e Policisë së Kosovës në kryerjen e obligimeve kushtetuese, sipas mandatit ligjor në kryerjen e obligimeve, sa i përket zbatimit të ligjit në Kosovë, në mënyrë profesionale, efektive dhe efikase”, thuhet në komunikatën e MPB-së.

Sipas tyre, pas urdhrit të Prokurorisë Speciale të Republikës së Kosovës, në veri të Kosovës, Policia e Kosovës arrestoi disa persona të dyshuar, të cilët dyshohen për përfshirje në rastin e vrasjes së politikanit, Oliver Ivanoviq.

“Arrestimi i këtyre personave nuk ndërlidhet me përkatësinë e tyre etnike apo fetare, por vetëm me dëshmitë për dyshimin se kanë kryer vepër penale. Është shumë e rëndësishme që në këto aksione t’u besohet vetëm organeve të drejtësisë në Kosovë dhe që në asnjë formë të mos bëhen deklarime politike me qëllim të pengimit të drejtësisë. Është përgjegjësi e secilit në Kosovë që të kontribuojnë në mbajtjen e qetësisë publike dhe të shërbejnë që secili të ndihet i lirë të jetojë dhe veprojë pavarësisht se cilës përkatësi etnike i takon”, thuhet në komunikatën e MPB-së.

Në fund, ministri Mustafa falënderon zyrtarët e Policisë e Kosovë të cilët me profesionalizëm kanë kryer të gjitha obligimet që ju jep ligji në raste të tilla.