Nderohet ushtari i KFOR-it që humbi jetën, flamuri amerikan në gjysmështizë

Në sheshin “Bill Clinton” flamuri amerikan është ulur në gjysmë shtizë, për të nderuar ushtarin amerikan Alexander Blake Klass nga Willamina e Oregonit, i cili vdiq si pasojë e një incidenti joluftarak më 4 korrik, pikërisht në kampin e Novosellës.

Flamuri amerikan do të qëndrojë në gjysmështizë 24 orë.

Pas uljes së flamurit, kreu i shoqatës “Miqtë e Amerikës”, Agim Rexhepi, u shpreh mirënjohës për kontributin e ushtarëve amerikanë në Kosovë.

“Në emër të popullit shqiptar u shprehu falënderim për pjesëmarrje trupave ushtarake të NATO-s, njëkohësisht ngushëllime armatës amerikane për vdekjen e ushtarit të tyre, Alexander Blake Klass nga Willamina e Oregonit, i cili ishte 20-vjeçar. Ne sot e ulëm në gjysmështizë flamurin amerikan në shenjë nderimi për këtë ushtar dhe do të qëndrojë 24 orë në këtë gjendje. Veprimi i tillë tregon që ne jemi të vetëdijshëm për sakrificën që e bëjnë institucionet jo vetëm amerikane, por në veçanti shtetit aleat i SHBA-së”, ka thënë ai.

Në Kosovë, në kuadër të misionit paqeruajtës të NATO-s, të njohur si KFOR, janë të angazhuar 460 ushtarë amerikanë, nga 4.000 trupa sa janë në total.