Nënshkruhet marrëveshja e grantit prej 2.5 milionë euro për KRU Hidromoravën

Ministri i Financave, Punës dhe Transfereve z. Hekuran Murati, Shefi i Zyres të BERZh në Kosovë, z. Sergiy Maslichenko dhe Sekretari Gjeneral i Hidromoravës z. Agim Smillaku kanë nënshkruar sot marrëveshjen e grantit prej 2.5 milionë euro për KRU Hidromorava. Ky grant mundësohet në kuadër të marrëveshjes “Nxitja dhe Levimi i Mundësive për Sigurinë e Ujit” dhe parasheh investime të ndryshme në fushën e ujërave dhe shërbimeve ujore.

Më saktësisht, granti përfshin 1 milionë euro për zgjerimin e rrjetit të ujërave të zeza, ndërsa 1.5 milionë euro për ndërtimin e impiantit të ujërave të zeza.

Projekti për trajtimin e ujërave të zeza në Gjilan kap vlerën totale prej afro 23.5 milionë euro, për të cilat tashmë është siguruar financimi. Implementimi i projektit është në fazën përgatitore dhe deri në fund të vitit pritet të fillojnë punimet në terren.

Nënshkrimi i kësaj marrëveshje është tejet me rëndësi për regjionin e Anamoravës, pasiqë përforcon kapacitetet e KRU Hidromorava dhe përmirëson kushtet e ambientit përmes trajtimit të ujërave të zeza për rreth 76 mijë qytetarë.