Osmani: Serbia nuk ka implementuar më shumë se gjysmën e marrëveshjeve të dialogut

“Asnjëra palë nuk mundet me vendosë kushte në mënyrë të njëanshme. Natyrisht se këtu ka një rol tepër të rëndësishëm Bashkimi Europian si ndërmjetësues i tërë procesit megjithatë në qoftë se veç përdoret një logjikë e tillë atëherë duke pas parasysh që Serbia nuk ka implementuar mbi 2/3 e marrëveshjeve që janë lidh me Kosovën që nga viti 2011 atëherë edhe Kosova do të mund të vendoste kushte të ngjashme duke mos pranuar që të vazhdonte dialogu pa u zbatuar ato marrëveshje nga ana e Serbisë”, tha Osmani për televizionin publik të Kosovës.

Osmani ka folur edhe për Asociacionin e Komunave me shumicë Serbe. Sipas saj, qeveria e Kosovës e ka të gatshme vendimin e Gjykatës Kushtetuese dhe qysh tash mund të fillojë me hartimin e statutit të atij asociacioni në përputhje të plotë me vendimin e kësaj gjykate dhe se nuk ka nevojë të presë as Serbinë e as deputetët serbë në qoftë se ata nuk shprehin vullnet të jenë pjesë e këtij procesi.