Prattipati: Pak miqësi e pasqyrojnë frymën e partneritetit më qartë sesa ajo midis Shteteve të Bashkuara dhe popullit të Kosovës

E ngarkuara me punë e Ambasadës së Shteteve të Bashkuara në Kosovë, Anu Prattipati, ka rikonfirmuar mbështetjen amerikane për Kosovën, duke theksuar se Uashingtoni do të vazhdojë të jetë partner i vendit në forcimin e institucioneve demokratike, zhvillimin ekonomik dhe rritjen e bashkëpunimit në fusha strategjike.

Në fjalën e mbajtur në ceremoninë e organizuar me rastin e 250-vjetorit të pavarësisë së Shteteve të Bashkuara, Prattipati tha se marrëdhënia mes SHBA-së dhe Kosovës është ndërtuar mbi vlera të përbashkëta, respekt të ndërsjellë dhe besim në një të ardhme të sigurt dhe me më shumë mundësi, raporton IndeksOnline.

“Shtetet e Bashkuara qëndrojnë në krah të Kosovës. Ne qëndrojmë në krah të Kosovës në përpjekjet e saj për të ndërtuar institucione të forta demokratike. Ne qëndrojmë në krah të Kosovës ndërsa ajo punon për të krijuar një ekonomi të begatë që tërheq investime dhe zgjeron mundësitë për të gjithë qytetarët e saj”, deklaroi ajo.

Prattipati nënvizoi se SHBA pret me interes forcimin e mëtejshëm të partneritetit me Kosovën, duke veçuar rritjen e tregtisë, investimet, mbrojtjen dhe energjinë si fusha me potencial të madh bashkëpunimi.

Sipas saj, një Kosovë e qëndrueshme, demokratike dhe e begatë është në interes jo vetëm të qytetarëve të saj, por edhe të Evropës dhe komunitetit ndërkombëtar.

Diplomatja amerikane vlerësoi gjithashtu kontributin e Kosovës në partneritetin me SHBA-në, duke përmendur pjesëmarrjen në misione ndërkombëtare, investimet në arsim dhe teknologji, si dhe angazhimin në programet e shkëmbimit akademik.

“Pak miqësi e pasqyrojnë atë frymë më qartë sesa ajo midis Shteteve të Bashkuara dhe popullit të Kosovës – një marrëdhënie e ndërtuar mbi vlera të përbashkëta, respekt të ndërsjellë dhe një besim të përbashkët në një të ardhme të përcaktuar nga mundësitë dhe siguria” u shpreh ajo.

Ky është fjalimi i plotë i Prattipatit:

Mirëmbrëma, presidentja në detyrë Haxhiu, kryeministër në detyrë Kurti, ministra, anëtarë të komunitetit diplomatik, miq dhe veçanërisht populli i Kosovës.

Sonte, ne mblidhemi për të festuar një moment vërtet historik – 250-vjetorin e pavarësisë amerikane.

Dy shekuj e gjysmë më parë, themeluesit tanë lançuan një komb të bazuar në guxim, qëndrueshmëri, inovacion dhe besimin e qëndrueshëm se çdo brez mund të ndërtojë një të ardhme më të fortë dhe më të begatë se e mëparshmja.

Nga ndjekja e Ëndrrës Amerikane te mbrojtja e lirisë, nga hapat e parë në hënë te përparimet në teknologji, Shtetet e Bashkuara gjithmonë kanë shikuar përpara – duke u përpjekur të krijojnë një bashkim më të përsosur.

Ndërsa shënojmë këtë 250-vjetor, ne nderojmë jo vetëm arritjet e së kaluarës, por edhe premtimin e një të ardhmeje të ndërtuar mbi forcën, inovacionin dhe mundësitë.

Mësimi i 250 viteve të para të Amerikës është se kombet e lira dhe sovrane janë më të forta kur investojnë në popullin e tyre, qeverisen vetë dhe krijojnë mundësi për brezat e ardhshëm. Këto janë parime që vazhdojnë të udhëheqin partneritetin tonë me Kosovën sot.

Ne e pranojmë se historia e Amerikës nuk është shkruar vetëm në vendlindje, por edhe në miqësitë dhe partneritetet që ndërtojmë në të gjithë botën.

Pak miqësi e pasqyrojnë atë frymë më qartë sesa ajo midis Shteteve të Bashkuara dhe popullit të Kosovës – një marrëdhënie e ndërtuar mbi vlera të përbashkëta, respekt të ndërsjellë dhe një besim të përbashkët në një të ardhme të përcaktuar nga mundësitë dhe siguria.

Gjatë vitit të kaluar, kam pasur privilegjin të udhëtoj nëpër Kosovë dhe të takoj njerëz që mishërojnë më të mirën e bashkëpunimit midis dy vendeve tona.

Kam parë vullnetarë të Korpusit të Paqes që punojnë krah për krah me komunitetet lokale, ish-studentët e programit tonë të shkëmbimit të qeverisë amerikane që udhëheqin me vizion dhe integritet, si dhe sipërmarrës e studentë të rinj që nxisin ndryshimin dhe inovacionin.

Populli i Kosovës është ura midis kombeve tona dhe është provë se vlerat që ndajmë – demokracia, kreativiteti dhe qëndrueshmëria – janë të gjalla dhe të shëndetshme.

Historia jonë na ka lidhur si kombe me të njëjtat qëllime dhe parime që ndajnë të njëjtat qëllime dhe parime. Kosova gjithmonë ka qëndruar në krah të Shteteve të Bashkuara, duke mbështetur prioritetet tona, duke kontribuar në Forcën Ndërkombëtare të Stabilizimit, në Bordin e Paqes, duke investuar në arsim dhe teknologji. Po kështu, Shtetet e Bashkuara qëndrojnë në krah të Kosovës. Ne qëndrojmë në krah të Kosovës në përpjekjet e saj për të ndërtuar institucione të forta demokratike. Ne qëndrojmë në krah të Kosovës ndërsa ajo punon për të krijuar një ekonomi të begatë që tërheq investime dhe zgjeron mundësitë për të gjithë qytetarët e saj, dhe mezi presim të forcojmë partneritetin tonë, duke përfshirë edhe përmes rritjes së tregtisë që çon përpara prosperitetin e përbashkët. Sepse një Kosovë e qëndrueshme, demokratike dhe e begatë nuk është vetëm e mirë për popullin e Kosovës, por është e mirë për Evropën dhe për botën.

Investimi juaj në programin Fulbright, përkushtimi juaj ndaj inovacionit dhe roli juaj si eksportues i sigurisë tregojnë se Kosova nuk është vetëm një partner, por një lidere e ardhshme në rajon.

Ndërsa Kosova vazhdon të thellojë integrimin e saj me bashkësinë ndërkombëtare, mundësitë për bashkëpunim – veçanërisht në mbrojtje, tregti, investime ekonomike dhe energji – janë të pakufizuara.

Bizneset amerikane po kërkojnë partnerë të besueshëm, fuqi punëtore të kualifikuar dhe tregje konkurruese. Kosova ka potencialin t’i bëjë të treja. Disa nga këto biznese po shfaqin punën e tyre këtu sonte. Shpresoj që të përfitoni nga prania e tyre për të mësuar më shumë rreth asaj që bëjnë dhe përfitimeve që u sjellin si Shteteve të Bashkuara ashtu edhe Kosovës.

Dua t’u drejtohem gjithashtu drejtpërdrejt të rinjve të Kosovës. Ju jeni arkitektët e së nesërmes. E ardhmja do t’u përkasë atyre që mund të përshtaten, të sjellin risi dhe të udhëheqin në një botë që ndryshon me shpejtësi. Burimi më i madh i Kosovës është talenti, energjia dhe ambicia e të rinjve të saj.

Zgjedhjet që bëni, vlerat që mbështesni dhe ëndrrat që ndiqni do të formësojnë jo vetëm fatin e Kosovës, por edhe të ardhmen e partneritetit tonë.

Duke punuar së bashku, ne mund të krijojmë një botë ku mundësitë nuk njohin kufij, ku dallimet zgjidhen përmes dialogut dhe ku çdo i ri ka mundësinë të formësojë fatin e vet.

Pra, sonte, ndërsa festojmë pavarësinë e Amerikës, le të reflektojmë mbi përparimin që kanë arritur kombet tona – dhe mbi mundësitë që na presin.

Të frymëzuar nga ajo që kemi arritur tashmë, ne mund të ndërtojmë një të ardhme të përcaktuar nga mundësitë, të nxitur nga inovacioni dhe të forcuar nga besimi se ditët tona më të mira janë ende përpara.

Faleminderit për miqësinë, besimin dhe vizionin tuaj. Gëzuar Ditën e Pavarësisë – dhe gëzuar 250 vitet e ardhshme!