Presidentja Osmani uron besimtarët ortodoksë për Pashkët: Uroj që festimi i radhës nuk do të na gjejë të distancuar fizikisht

Presidentja e Republikës së Kosovës, Vjosa Osmani përmes një komunikate për media ka uruar besimtarët ortodoks për pashkët.

Osmani ka thënë se ringjallja, ringritja dhe shpresa janë elementet kryesore të kësaj feste, e cila edhe këtë vit po kremtohet në rrethana jo të lehta për secilin prej nesh.

 “Nëpërmjet solidaritetit dhe urimeve virtuale, sot besimtarët do të mund ta përçojnë mesazhin e Pashkëve, duke respektuar masat anticovid dhe duke uruar që festimi i radhës  nuk do të na gjejë të distancuar fizikisht”, ka thënë ajo.

 Më tej, në urimin e saj, Presidentja  ka theksuar se festat si kjo janë manifestim i vlerave tona të përbashkëta njerëzore, humanizmit e solidaritetit me të cilat çdo betejë fitohet, ngjallet shpresa për të ardhmen!

“Në këtë ditë feste, duhet t`i kujtojmë ata që po bëjnë të pamundurën për t`i zvogëluar humbjet dhe dhimbjet nga pandemia. Kremtet tona tradicionalisht janë shquar për solidaritet të ndërsjellë. Në këtë ditë, uroj që paqja dhe respekti të mbretërojë në secilën familje”, ka thënë Presidentja Osmani.