Raportohet se pesë futbollistë të Ekuadorit u kërcënuan me “pistoletë në kokë”: Nëse fitoni, ju vrasim familjen

Një lajm i bujshëm dhe pothuajse i pabesueshëm ka qarkulluar menjëherë pas ndeshjes mes Meksikës dhe Ekuadorit.

Me humbjen 2-0 ndaj meksikanëve, kombëtarja e Ekuadorit i dha fund rrugëtimit të saj në Kupën e Botës. Përpara më shumë se 80,000 tifozëve të zjarrtë në stadiumin mitik “Azteca”, ekipi vendas festoi kualifikimin, por festa u hijezoi shpejt nga akuzat tronditëse që shpërthyen në mediat ekuadoriane.

Sipas raportimeve, prapaskenat e kësaj sfide fshehin ngjarje të jashtëligjshme: kartelet famëkeqe meksikane dyshohet se kanë ndërhyrë drejtpërdrejt, duke terrorizuar lojtarët e Ekuadorit dhe familjet e tyre me kërcënime të hapura.

Kërcënimet ndaj familjeve shkatërruan moralin e skuadrës

Sipas mediave ekuadoriane, ky presion psikologjik ishte arsyeja kryesore pse morali i skuadrës ra, gjë që solli një paraqitje të pazakontë, të zbehtë dhe të mbytur në konfuzion gjatë ndeshjes fatale. Portalet sportive në Ekuador u përmbytën me detaje rreth këtij incidenti të rëndë.

Ndonëse aktualisht nuk ka prova materiale apo zyrtare që mbështesin publikisht këto akuza të rënda, disa burime të pavarura ofrojnë dëshmi identike dhe mjaft rrëqethëse mbi metodat e presionit të përdorura ndaj futbollistëve.

Raportohet se kriminelët shënjestruan një grup specifik lojtarësh pak përpara se ata të zbrisnin në fushën e stadiumit ikonik. Persona të lidhur met kartelet dyshohet se kanë kontaktuar pesë futbollistë ekuadorianë përmes telefonit. Gjatë këtyre bisedave, atyre u janë diktuar të dhëna mjaft private: adresat e sakta dhe rrugët e lëvizjes së familjarëve të tyre në atdhe, si dhe të atyre që jetojnë aktualisht në Meksikë. Kjo jep një shpjegim logjik se pse skuadra dukej krejtësisht e shpërqendruar dhe pa asnjë agresivitet sportiv në duelin që vendoste kualifikimin për në raundin e 16-të.

Dëshmia e gazetarit Carlos Vera: “Luajtën pa asnjë fije guximi”

Gazetari i njohur ekuadorian, Carlos Vera, ka konfirmuar publikisht se ka dijeni për ngjarje mjaft të dyshimta prapaskenave. Megjithatë, ai theksoi se pa pasur dokumente zyrtare, është e vështirë të nxirren përfundime të prera.

Carlos Vera u shpreh: “A dërgoi mafia kërcënime? Unë jam i informuar personalisht se kërcënime të tilla i janë dërguar familjes së një prej lojtarëve të kombëtares sonë që jeton në Meksikë. Nuk mund të flas me siguri 100% për të tjerët, por vetëm një skenar i tillë mund të gjente një shpjegim logjik për atë që pamë në fushë.

Ekipi luajti pa asnjë grimë guximi; u bënë gabime të pakuptueshme, amatoreske, dhe humbëm raste të pastra. Paraqitja jonë ishte krejtësisht e pashpjegueshme. Ka shumë mundësi që familjet të kenë qenë nën kërcënim të drejtpërdrejtë.”

Reagimet zyrtare dhe revolta në Meksikë

Nga ana tjetër, institucionet zyrtare aktualisht nuk kanë asnjë të dhënë për këtë frikësim të supozuar. Federata Ekuadoriane e Futbollit, FIFA, si dhe autoritetet shtetërore meksikane kanë deklaruar se nuk kanë marrë asnjë denoncim zyrtar apo ankesë nga lojtarët apo stafi.

Në Meksikë, ky lajm është pritur me indinjatë të thellë dhe reagime të ashpra. Publiku dhe mediat vendase pretendojnë se kjo është thjesht një alibi klasike e ekuadorianëve për të justifikuar dështimin në turne, duke përzier sportin me krimin e organizuar mbi baza thashethemesh, me qëllim që të zbehin kualifikimin e merituar të kombëtares meksikane.

Megjithatë, fakti që ky lajm qarkullon nga gazetarë seriozë në Ekuador lë ende hije dyshimi. Nëse në ditët në vijim do të shfaqen dëshmi nga vetë lojtarët apo prova të forta, ky do të shndërrohej pa dyshim në një nga skandalet më të mëdha në historinë e kampionateve botërore.

󠁧󠁢Çfarë pritet të ndodhë në sfidën Meksikë – Angli?

Meksikën e pret një sfidë gjigante sportive në raundin e 16-të, ku më 6 korrik do të ndeshet me Kombëtaren e fuqishme të Anglisë në stadiumin “Azteca”. Mbetet për t’u parë nëse këto histori jashtë-sportive do të vazhdojnë të ndjekin meksikanët në prag të këtij derbi të madh, por një gjë është e sigurt: anglezët nuk janë nga ata që dorëzohen lehtë apo që preken nga presione të tilla jashtë fushe.