Rexhepi: Rezoluta e OKB-së që dënon gjenocidin në Srebrenicë, është hap drejt së vërtetës, drejtësisë dhe pajtimit në rajon

Zëvendëskryeministrja Emilija Rexhepi ka mbështetur rezolutën e OKB-së që dënon gjenocidin e pafalshëm në Srebrenicë.  Ajo ka thënë se ky dokument përfaqëson jo vetëm një detyrim moral por edhe një hap drejt së vërtetës, drejtësisë dhe pajtimit në rajon.

“Si zëvendëskryeministre e Republikës së Kosovës, si grua boshnjake dhe mbi të gjitha si qenie njerëzore, shpreh mbështetjen time të thellë për rezolutën e OKB-së që dënon gjenocidin e pafalshëm në Srebrenicë.  Ky dokument përfaqëson jo vetëm një detyrim moral por edhe një hap drejt së vërtetës, drejtësisë dhe pajtimit në rajon.  Mbështetja jonë për këtë rezolutë pasqyron angazhimin tonë të vendosur për respektimin e të drejtave të njeriut, sundimin e ligjit dhe ndërtimin e paqes së qëndrueshme në Ballkan”, ka thënë Rexhepi.

 Ndërsa ka thënë se Kosova, si një vend që vetë ka kaluar nëpër sprova të vështira dhe shkatërrime luftarake, i kupton vuajtjet dhe humbjet që ka pësuar populli i Bosnjës dhe Hercegovinës.

“Kjo është arsyeja pse ne angazhohemi të punojmë së bashku me të gjitha vendet e rajonit për të ndërtuar një të ardhme të bazuar në respektimin e diversitetit, paqes dhe prosperitetit. Ky moment na kujton gjithashtu rëndësinë e dëshmimit të së vërtetës dhe përballjes me të kaluarën. Vetëm përmes dialogut të hapur, hulumtimit dhe njohjes së gabimeve të së kaluarës, mund të sigurohemi që tragjeditë e papërsëritshme të mos harrohen dhe të mësohen mësime për të ardhmen. Në këtë frymë, Republika e Kosovës mbështet fuqishëm të gjitha përpjekjet ndërkombëtare që synojnë pajtimin, rivendosjen dhe ndërtimin e paqes së qëndrueshme në Ballkan. Vizioni ynë për rajonin është ai në të cilin dallimet vlerësohen, të drejtat e njeriut respektohen dhe të rinjtë kanë mundësinë për të ndërtuar një të ardhme më të mirë. Falënderoj komunitetin ndërkombëtar për mbështetjen dhe u bëj thirrje të gjitha vendeve që të punojnë së bashku për të arritur këto synime”, ka thënë Rexhepi.