Robben lëndohet përsëri, nuk luan ndaj Liverpoolit
Veterani holandez i Bayern Munich vazhdon të jetë i pafat me lëndimet.
Arjen Robben është lënduar sërish dhe do të humbasë përfundimisht sfidën me Liverpoolin të mërkurën në Ligën e Kampionëve.
Holandezi shpresonte se do të rikuperohej për këtë sfidë, por ai ka pësuar një lëndim tjetër që do e mbajë përgjatë tre javëve të tjera larg fushave të blerta.
35-vjeçari ka lënduar pulpën sapo është kthyer në stërvitje këtë javë. Ndeshja e fundit që ai ka luajtur ishte në nëntorin e vitit të kaluar në Ligën e Kampionëve kundër Benficas, ku madje shënoi dy gola.
Kujtojmë se ndeshja e parë mes Liverpoolit dhe Bayernit e zhvilluar në Anfield ishte mbyllur pa gola.