Selmanaj: Thaçi, dirigjent i seancës së jashtëzakonshme

Deputeti i Lidhjes Demokratike të Kosovës, Driton Selmanaj ka pyetur pse duhet të votohet një ekip i qeverisë, kur këtë mandat Qeveria e ka që nga rezoluta e Kuvendit e vitit 2011.

Ai në Facebook ka shkruar se dirigjent i gjithë kësaj situate është Hashim Thaçi.

“Na kritikuan pse kemi thirr seancën e jashtëzakonshme për ta ndal Hashim Thaçin në zbatimin e projektit të përbashkët me Vuqiqin për pazare me territorin e Kosovës! E qfarë bënë “ komandantat”? U mobilizuan natën dhe thirren seancë tjetër të jashtëzakonshme… Pse? Për çka? Pse u dashka te votohet një ekip i qeverisë, kur këtë mandat qeveria e ka që nga rezoluta e Kuvendit e vitit 2011. Përgjigja është dikun tjetër, më saktë në zyrën e Presidentit… Ai është dirigjenti i gjithë kësaj situate… i kap për hunde dhe i tërheq Limajn dhe Ramushin sipas nevojave të tij. Ai ka zor të madh sepse pas çdo takimi me Limajn e Ramushin ai duhet ta thrras për ti raportuar djalit jo problematik – mikut të tij Aleksandrit. Për ta ndal Hashimin, na duhet bashkim dhe mobilizim i të gjithëve, brenda dhe jashtë politike, brenda dhe jashtë institucioneve”, ka shkruar ai, duke shtuar se me shtetin nuk ka lojë.