Shpenzime marramendëse dhe të ftuar VIP/ Çfarë do të ndodh në dasmën 1 milionëshe të Dua Lipës?

Këngëtarja kosovare me famë botërore Dua Lipa dhe bashkëshorti i saj, aktori Callum Turner, pritet të kurorëzojnë sërish dashurinë e tyre këtë fundjavë me një ceremoni madhështore treditore në Siçili, vlera e së cilës raportohet të arrijë në rreth 1 milion paund.

Vetëm pak orë pasi çifti zhvilloi një ceremoni private në Londër, autoritetet dhe organizatorët nisën përgatitjet për festimet luksoze në Palermo, ku disa rrugë pranë vendeve të planifikuara për eventin janë mbyllur për shkak të organizimit, transmeton Indeksonline.

Në listën e të ftuarve pritet të jenë disa prej emrave më të njohur të industrisë së muzikës dhe argëtimit, përfshirë Elton John, Olivia Dean, Mark Ronson dhe Charli XCX.

Mediat britanike raportojnë se Elton John mund të mbajë edhe një performancë të veçantë për çiftin, ndërsa atmosfera rreth dasmës ka tërhequr vëmendje të madhe në Palermo gjatë ditëve të fundit.

Fillimisht ishte raportuar se ceremonia do të zhvillohej në muajin shtator, por data duket se është afruar. Sipas spekulimeve, kjo lidhet me angazhimet profesionale të Dua Lipës, e cila mund të performojë në Romë gjatë asaj periudhe.

Ceremonia kryesore pritet të mbahet në Villa Valguarnera, një rezidencë historike e shekullit të 17-të, e konsideruar ndër më luksozet në zonën e Bagherias, rreth 16 kilometra larg Palermos. Ambienti barok dhe pamjet mahnitëse të vilës pritet t’i japin dasmës një atmosferë përrallore.

Sipas raportimeve, Dua Lipa do të shfaqet me një fustan të dizajnuar nga Versace, duke i shtuar edhe më shumë shkëlqim një prej ngjarjeve më të përfolura të showbiz-it ndërkombëtar këtë vit./Indeksonline/