07:48 / E Mërkurë, 22 Maj 2024 / MSH

Vazhdon procesi gjyqësor ndaj ish-krerëve të UÇK-së

Në Dhomat e Specializuara në Hagë edhe sot do të vijojë procesi gjyqësor ndaj ish-krerëve të UÇK-së: Hashim Thaçi, Kadri Veseli, Rexhep Selimi e Jakup Krasniqi.

Seanca e sotme do të fillojë në ora 09:00 dhe parashihet të zgjasë mbi 7 orë, raporton Indeksonline.

Në seancën e sotme pritet të dëshmojë dëshmitari i 64-të i Zyrës së Prokurorit të Specializuar Johan Fritsch, i cili ka filluar dëshmonë të martën në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Pyetjet për atë i ka filluar përfaqësuesja e ZPS-së, prokurorja Vega Iodice.

Dëshmitari ka theksuar dje se pjesët e ditarit të tij i kishte shkruar çdo mbrëmje dhe ishin të vërteta ato se çfarë përmbante ai.

Dëshmitarit iu prezantuan disa fotografi që sipas dëshmitarit paraqiteshin lëndimet e personave që ishin gjetur si të ndaluar në godinën e MUP-it e cila ishte nën zotërimin e UÇK-së, disa ishin nga ndërhyrjet në ndërtesën e MUP-it ku ishe gjetur edhe personi i vdekur.

Procesi gjyqësor do të vijojë edhe në dy ditët e ardhshme, teksa javën që vjen do të ketë po ashtu seanca të radhës.

Pasditen e djeshme u raportua se pritet të shkurtohet lista e dëshmitarëve të Prokurorisë në rastin që e quajnë “Thaçi dhe të tjerët”.

Hektor Beqiri që njihet për mbështetjen e ish-drejtuesve të UÇK-së ka përcjell nga afër seancën e sotme ku, sipas tij, është vendosur për largimin e disa dëshmitarëve nga ana e Prokurorisë dhe pranimin e disa deklaratave vetëm me shkrim./Indeksonline/