Vrasje në Prishtinë, pronari i shtëpisë qëllon me armë hajnin
(I plotësuar) 23:18- Hetuesit policor kanë qëndruar deri vonë në vendin ku ka ndodhur vrasja në Veternik të Prishtinës. Ata kanë marrë të gjitha gjurmët nga vendi i ngjarjes në përpjekje për të ndriçuar dhe sqaruar të gjitha rrethanat që kanë të bëjnë me rastin.
—
22:50- Banorët e lagjes kanë treguar për Indeksonline se kanë dëgjuar disa të shtëna nga shtëpia ku ka ndodhur vrasja, porse sipas tyre nuk kanë parë asnjë njeri pastaj aty derisa në vendin e ngjarjes është paraqitur policia.
—
22:34- Policia është në pritje të Prokurorit kujdestar për t’iu përgjigjur vendit të ngjarjes. Sipas gazetarëve të Indeksonline, personi i vrarë ndodhet ende në vendin e ngjarjes dhe se aty tashmë ka arritur edhe Njësiti i Forenzikes nga Policia e Kosovës i cili po merr gjurmët e gishtërinjve në derën e provat nga vendi i ngjarjes.
—
22:17 – Dëshmitarët në vendin e ngjarjes kanë thënë për Indeksonline se një person është shoqëruar në Stacion të Policisë në Prishtinë për tu intervistuar në lidhje me ngjarjen.
—
22:10- Në vendin e ngjarjes kanë dalë të gjitha njësitet përkatëse të Policisë së Kosovës dhe autoambulanca. Policia ka siguruar zonën ku ka ndodhur vrasja ndërsa hetimet janë në fazën fillestare.
—
22:02- Një person është vrarë sonte rreth orës 21:00 në Veternik të Prishtinës.
Burimet e Indeksonline brenda policisë kanë thënë se disa hajna kishin hyrë për të vjedhur në një shtëpi, ndërsa pronari i saj ka shtënë në drejtim të tyre duke e lënë një të vdekur.
Në vendin e ngjarjes menjëherë kanë dalë njësitet policore të cilat po merren me hetimin e rastit.
Indeksonline do t’iu mbajë të informuar për këtë rast…