Pogba drejt Juventusit, me kontratë deri në 80 milionë euro

Paul Pogba mund të nënshkruajë një kontratë katërvjeçare me Juventusin në një marrëveshje me vlerë deri në 80 milionë euro, sipas raportimeve në Itali.

Më 1 qershor, Manchester United njoftoi se mesfushori francez do të largohej nga klubi kur kontrata e tij skadon në fund të muajit.

Pavarësisht interesimit të raportuar nga Paris Saint-Germain dhe Real Madrid, duket se ai do t’i bashkohet Juventusit në një transferim të lirë për herë të dytë në karrierën e tij.

Gazzetta dello Sport raporton se ai do të fitojë deri në 10 milionë euro neto në sezon, të përbërë nga 7,5-8 milionë euro plus bonuse.

Pogba po kërkon të jetë në qendër të një projekti sportiv pas gjashtë sezoneve të vështira te United.

Sipas Gazzetta-s, kontrata, tarifat e agjencisë dhe nënshkrimit, si dhe bonuset e ndryshme mund ta bëjnë shumën totale të paguar për këtë marrëveshje 80 milionë euro.