KDI kërkon nga Qeveria transparencë mbi dialogun Kosovë-Serbi

Instituti i Kosovës për Demokraci ka kërkuar që Qeveria e Kosovës të jetë më transparente në lidhje me dialogun Kosovë – Serbi.

Sipas KDI-së, përderisa procesi gjendet në një fazë mjaft delikate, qytetarët e Kosovës nuk janë të informuar mbi përmbajtjen e takimeve të ndërlidhura me dialogun dhe dakordimet eventuale lidhur me këtë proces.

Komunikata e plotë:

𝗞𝗗𝗜: 𝗤𝗲𝘃𝗲𝗿𝗶𝗮 𝘁𝗲̈ 𝗼𝗳𝗿𝗼𝗷𝗲̈ 𝘀𝗮 𝗺𝗲̈ 𝗽𝗮𝗿𝗲̈ 𝗾𝗮𝗿𝘁𝗲̈𝘀𝗶 𝗽𝗲̈𝗿 𝗾𝘆𝘁𝗲𝘁𝗮𝗿𝗲̈𝘁 𝗺𝗯𝗶 𝗱𝗶𝗮𝗹𝗼𝗴𝘂𝗻 𝗞𝗼𝘀𝗼𝘃𝗲̈-𝗦𝗲𝗿𝗯𝗶

Vizitat e shpeshta të emisarëve special nga Shtetet e Bashkuara dhe Bashkimi Evropian po dëshmojnë për një dinamikë të shtuar në dialogun mes Kosovës dhe Serbisë. Përderisa procesi gjendet në një fazë mjaft delikate, qytetarët e Kosovës janë të pa informuar mbi përmbajtjen e takimeve të ndërlidhura me dialogun dhe dakordimet eventuale lidhur me këtë proces.

Diskutimet mbi përmbajtjen e propozimit Franko-Gjerman/Evropian dhe zbatimin e  Marrëveshjes së Dialogut mbi Asociacionin janë temat kryesore në debatet mediale, ndërkohë që mungon një debat i strukturuar politik e shoqëror dhe një mostransparencë e theksuar e Qeverisë mbi qëndrimet e saj në raport me këto propozime.

Duke qenë i mbyllur dhe i reduktuar, ky proces çdo ditë e më tepër po krijon hapësirë për dezinformim, pasiguri dhe ulje të besimit të publikut. Informacionet selektive dhe deklaratat e kufizuara të emisarëve ndërkombëtarë mbeten burimet e vetme të informacioneve, ndërkohë që Qeveria po shmang adresimet për publikun.

Prandaj Qeveria si mandatare për të udhëhequr dialogun me Serbinë duhet të jetë e hapur dhe t’a informojë publikun lidhur me qëndrimet e saj dhe të priturat nga ky proces. Kjo duhet të përfshijë edhe raportimet me vetiniciativë të Kryeministrit në Kuvendin e Kosovës, si institucioni më i lartë përfaqësues.

Meqë përmbyllja e dialogut Kosovë-Serbi është çështje e interesit nacional, pritjet tona janë që edhe subjektet politike opozitare të tregohen të përgjegjeshme dhe serioze në përpjekjet e tyre për ta  mbajtur Qeverinë llogaridhënëse dhe për të ofruar kapacitetet e tyre në formësimin e qëndrimeve sa më konsensuale të palës kosovare. Në këtë drejtim, opozita përmes praktikave dhe instrumenteve kushtetuese parlamentare, do të duhej të ftonte Kryeministrin në raportim në një seancë të jashtëzakonshme të Kuvendit, në lidhje me zhvillimet në procesin e dialogut. /IndeksOnline/