Para ndeshjes më Izraelin, Gattuso thotë se atmosfera nuk është e mirë

Trajneri i Italisë, Gennaro Gattuso, e ka pranuar se atmosfera rreth ndeshjes me Izraelin është e pazakontë, por ka theksuar se skuadra e tij duhet të mbetet e përqendruar.

Ndeshja mes Italisë dhe Izraelit, që do të zhvillohet të martën në Udine, do të luhet nën masa të rrepta sigurie dhe me një numër të kufizuar tifozësh. Kjo pason protestat e shumta që janë mbajtur në Itali kundër ofensivës izraelite në Gaza, ku vetëm javën e kaluar u zhvilluan demonstrata të mëdha pro-palestineze në disa qytete.

“Po shkojmë në Udine dhe e dimë që nuk do të ketë shumë tifozë, kuptoj këtë, e kuptoj shqetësimin. Por ndeshja duhet të luhet, përndryshe do të humbasim automatikisht me rezultatin 3-0”, ka thënë Gattuso.

Ai ka shtuar se lojtarët duhet të përqendrohen vetëm te loja: “Duhet të punojmë me vëmendje dhe të mos ndikojmë nga gjithçka që po ndodh jashtë. Atmosfera nuk është e mirë, por ne duhet të bëjmë detyrën tonë. Na dhemb zemra kur shohim çfarë po ndodh. E dimë se do të ketë rreth dhjetë mijë njerëz jashtë stadiumit dhe gjashtë mijë brenda”.

Italia aktualisht ka nëntë pikë në Grupin I të kualifikimeve për Botërorin, po aq sa Izraeli, ndërsa Norvegjia kryeson me pesëmbëdhjetë pikë. “Azzurrët” kanë një ndeshje më pak të zhvilluar.

Gattuso ka nisur mirë aventurën e tij në stolin e Italisë me dy fitore në dy ndeshje, megjithatë ai ka kujtuar vështirësinë e fitores 5-4 ndaj Izraelit në shtator, ku Sandro Tonali e kishte shënuar golin vendimtar në fund.

“Ka shumë gjëra që duhet t’i përmirësojmë. Nuk ka të bëjë vetëm me mbrojtjen, por me aftësinë për të ndier rrezikun në çdo pjesë të fushës. Në të njëjtën kohë, ka edhe shumë anë pozitive. Ishim ne ata që e lamë Izraelin të kthehej në lojë dhe patëm fat që fituam. Duhet të përmirësojmë qasjen tonë, nuk është çështje e sistemit taktik”, është shprehur trajneri italian.