“Demarkimi me Serbinë i pashmangshëm, nuk do lëvizim kufijtë në Ballkan”

Demarkimi i kufirit me Serbinë është i pashmangshëm, mirëpo pretendimet se Kosova dëshiron të ndryshojë kufijtë në Ballkan janë të pavërteta, përcjellë Indeksonline.

Kështu citohet të ketë thënë Presidenti i Kosovës, Hashim Thaçi, në darkën e përbashkët mes liderëve të Ballkanit Perëndimor me nikoqirët e kësaj darke kancelaren Angela Merkel e presidentit francez Emmanuel Macr.

Thaçi në një fotografi të ndarë në rrjetet sociale nga kjo darkë e të shoqëruar me një status, ka renditur, arsyet të cilat sipas tij, kanë sjellë në një situatë të pashpresë sa i përket dialogut mes Kosovës dhe Serbisë.

Në njërën anë, për këtë gjendje ai ka fajësuar Serbinë për bllokadën që ka bërë, derisa nuk ka kursyer as  shtete e Quintit për mosunitet në këtë çështje.

Më poshtë mund të gjeni statusin e plotë të Thaçit:

Me kancelaren Merkel, presidentin Macron dhe liderët e Ballkanit Perëndimor, në darkën e përbashkët vazhduam të diskutojmë për të tashmen dhe të ardhmen e rajonit tonë.

Për bllokadën në të cilën gjendet dialogu ndërmjet Kosovës dhe Serbisë, unë theksova disa faktorë që e kanë sjellë këtë situatë të pashpresë.

Së pari, Serbia në mënyrë të njëanshme e ka kushtëzuar vazhdimin e dialogut me heqjen e tarifës për prodhimet serbe. Ky veprim është i papranueshëm dhe në kundërshtim me parimin kryesor udhëheqës të dialogut, të cilin e kemi respektuar që nga pikënisja e tij.

Së dyti, faktori ndërkombëtar, në mënyrë specifike shtetet e Kuintit, nuk kanë dëshmuar unitet dhe përkrahje për përpjekjet tona për marrëveshje gjithëpërfshirëse. Këtë marrëveshje nuk mund ta arrijmë nëse shtetet e Kuintit nuk janë të bashkuara dhe nuk flasin me një zë. Po ashtu, edhe shtetet e Kuintit, edhe ne e dimë se kjo marrëveshje është e pamundur të arrihet pa rolin vendimtar të SHBA-së.

Kundërshtimet kryesisht janë bërë duke keqinformuar dhe duke rritur frikën se gjoja ne po përpiqemi t’i ndryshojmë kufijtë në Ballkan dhe ata i duam përgjatë vijave etnike. Por, këto pretendime kanë qenë dhe janë tërësisht të pavërteta!

Kurdo që arrihet një marrëveshje ndërmjet Kosovës dhe Serbisë, demarkimi i kufirit ndërmjet dy shteteve është i pashmangshëm.

Sovraniteti shtetëror i Kosovës është dhe do të mbetet i pacenueshëm. Serbia duhet ta njoh pavarësinë e Kosovës dhe të heq dorë nga cenimi i sovranitetit tonë. Pretendimet apo ëndrrat e kujtdo se në veri të Kosovës mund të themelohet një Asociacion me kompetenca ekzekutive e modelit të Republikës Serbe, nuk do të realizohen kurrë.

Nuk mund të këtë një zgjidhje as në modelin gjermano-gjerman dhe as me një sovranitet të dyfishtë. Kosova në mënyrë të përgjegjshme dhe legjitime interesohet dhe përkrah aspiratat e shqiptarëve që jetojnë në Luginën e Preshevës. Kosova është e gatshme për marrëveshje gjithëpërfshirëse përfundimtare për normalizimin e marrëdhënieve ndërshtetërore me Serbinë! HTH